ئه‌لمانیا دخوازیت حزبوللا بێخیته‌د لیستا ته‌رۆرێ دا

ئه‌لمانیا دخوازیت حزبوللا بێخیته‌د لیستا ته‌رۆرێ دا

حكوومه‌تا ئه‌لمانیایێ دخوازیت حزبوللا یا لبنانێ بێخیته‌ د لیستا ته‌رۆرێ یا یه‌كێتییا ئه‌ورۆپایێ ده‌ و خه‌باتێن خوه‌ ژ بۆ ڤێ ئامانجێ ده‌ست پێ كرنه‌.

پێگه‌ها دێرشپێگل یا ئه‌لمانی ئه‌شكه‌ره‌ كر، ته‌نێ بالێ له‌شكری یێ حزبوللا یا لبنانێ نها د لیستا ته‌رۆرێ یا یه‌كێتییا ئه‌ورۆپایێ جی دگره‌، لێ به‌لێ حكوومه‌تا ئه‌لمانیایێ دخوازه‌ حزب ب ته‌ڤاهی، بكه‌ڤه‌ د وێ لیستێ ده‌.

ل ڤێ ده‌ربارێ ده، شێوه‌رمه‌ندێ وه‌زاره‌تا كارێن ناڤخوه‌ یا ئه‌لمانیایێ هانس جۆرج ئێنگێلیك ته‌كه‌ز كر كو حزبوللا رێخستنه‌كا ته‌رۆری یه‌، له‌وما دبه‌ ب ته‌ڤاهی واته‌ بالێ وێ ئێ سیاسی و له‌شكری بكه‌ڤه‌ د لیستا ته‌رۆرێ یا یه‌كێتییا ئه‌ورۆپایێ ده‌.

ده‌ست نیشان كر، ئه‌لمانیا كو نها سه‌رۆكا ده‌مكی یا یه‌كێتییا ئه‌ورۆپایێ یه‌، خه‌باتێن خوه‌ ژ بۆی وێ یه‌كێ ده‌ست پێ كرنه‌ كو حزبوللا بكه‌ڤه‌ د لیستا ته‌رۆرێ یا یه‌كێتییا ئه‌ورۆپایێ ده‌.

تێ زانین هه‌یا نها فره‌نسا ل دژی وێ هه‌نگاڤێ د سه‌كه‌نی و نه‌دخوه‌ست حزبوللا بكه‌ڤه‌ د لیستا ته‌رۆرێ ده‌، لێ به‌لێ پاش ته‌قینا به‌یرۆتێ و ره‌خنه‌ گرتنا ئه‌مانوێل ماكرۆن ژ بۆ حزبوللایێ، دبه‌ فره‌نسا نها پشتگریێ ل ڤێ هه‌نگاڤا ئه‌لمانیایێ بكه‌.