شه‌رێ ل سه‌ر هه‌رێما كاراباخێ ژ هه‌ردوو ئه‌نیێن باكور و باشوور دژوار بوویه، وه‌زاره‌تا به‌رگریێ یا ئه‌رمه‌نستانێ ئه‌شكه‌ره كر، ئازه‌ربیجانێ هێزه‌كا زێده ل خه‌تا ته‌ماسێ كۆم كرییه.
به‌رده‌ڤكا وه‌زاره‌تا به‌رگرییا ئه‌رمه‌نستانێ شۆشان ستیبانیان ئیرۆ رۆژا شه‌می 3/10/2020ان ئه‌شكه‌ره كر، ئازه‌ربیجانێ هێزه‌كا هه‌ری زێده ل ئه‌نیێن باكور و باشوور یێن هه‌رێما كاراباخێ و خه‌تا ته‌ماسێ كۆم كرنه و شه‌ره‌كێ دژوار ئیرۆ ده‌ست پێ كرییه.
ده‌ست نیشان كر، ئارته‌شا ئه‌رمه‌نستانێ به‌رگرییه‌كه بێ هه‌مپا دكه و رێ ل پێشڤه‌هاتنا ئارته‌شا ئازه‌ربیجانێ گرتییه.
ل ده‌ربارا زرارێن 24 ده‌مژمێرێن رابووری، ستیبانیان گۆت كو وان 3 باله‌فرێن جه‌نگ یێن ئازه‌ربیجانێ تێكشكاندنه.
ل ئالێ دن هه‌ر ئیرۆ وه‌زاره‌تا به‌رگرییا ئازه‌ربیجانێ ئه‌شكه‌ره كر، هێزێن وان ده‌ست دانییه سه‌ر هه‌ژماره‌كا نوقته‌یێن ئارته‌شا ئه‌رمه‌نستانێ ل خه‌تا ته‌ماسێ ل هه‌رێما كاراباخێ و ئه‌و ده‌ر پاقژ كرنه.
هه‌روه‌ها ل ده‌ربارا زرارێن ئه‌رمه‌نستانێ گۆت ته‌نێ ئیرۆ وان هه‌ژماره‌كه عه‌سكه‌ران و ئالاڤێن له‌شكری ژ ناڤ برنه.
