ئیران: مە ژ بۆ قەرەباخێ پلانا چارەسەریێ ئامادە کر

ئیران: مە ژ بۆ قەرەباخێ پلانا چارەسەریێ ئامادە کر

بەردەڤکێ وەزارەتا دەرڤەیا ئیرانێ سەید خەتیبزادە راگەھاند کو وان ل سەر شەرێ ئەرمەنستان و ئازەربایجانێ یێ ل ھەرێما قەرەباخێ، ژ بۆ چارەسەریەکا ئاشتیانە، پلانەک ئامادە کریە.

ل گۆر نووچەیا ئاژانسا نووچەیان یا مەھر، سەید خەتیبزادە ل سەر کریزا ھەرێما قەرەباخێ راگەھاندیە: “ئیران ژ رۆژا کو پەڤچوون دەست پێ کریە، دبێژیتە هەر دو لایەنان کو ئەڤ ناکۆکیا ب سالان، ب رێیا لەشکەری چارەسەر نابیت. ئەم رێز ل یەکپارچەبوونا ئاخا ئازەربایجانێ و پێویستیا ڤەکشاندنا لەشکەران ژ باژارێن داگیرکری دگرین و ئەم تەکەز دکەین کو ژ بۆ دەستپێکرنا دیالۆگەکا سیاسی یا گشتگیر، دڤێت پەڤچوونا لەشکەری دەملدەست بهێتە راوەستاندن.”

سەید خەتیبزادە ھەروھا ئاشکەرا کریە: “ئیرانێ ژ بۆ ڤێ یەکێ، پلانەکا بەرفرەھ ئامادە کر و ئەڤ پلان د دەما ھەڤدیتنێن لگەل ھەر دو لایەنان و وەلاتێن ھەرێمێ دا دێ هێتە پێکئانین.”

بەردەڤکێ وەزارەتا دەرڤە یا ئیرانێ دەربارێ ھوورگلیێن پلانێ دا و ل سەر ڤێ مژارێ زانیاریەکا دی نەدا.