ئەسەد: ئەردۆگان شەران گەرم دکەت

ئەسەد: ئەردۆگان شەران گەرم دکەت

سەرۆکێ سووریێ بەشار ئەسەد راگەھاند، سەرۆک کۆمارێ ترکیێ رەجەب تەییب ئەردۆگان کۆمێن چەکدارێن سووریێ ب کار دئینیت و شەران چێدکەت دا کو سەرنجا رایا گشتی یا ترکان ژ سەر ئاریشەیێن ناڤخۆ نەهێلیت.

سەرۆکێ سووریێ بەشار ئەسەد ئیرۆ رۆژا سێشەمێ 6/10/2020ێ د ھەڤپەیڤینەکێ دا ل گەل ئاژانسا نۆڤۆست، سەرۆک کۆمارێ ترکیێ رەجەپ تەییب ئەردۆگان ب پشتگریا رێخستنێن کۆمێن چەکدار  ل سووریە و لیبیایێ و گەرمکرنا شەرێ ل قەرەباخێ تاوانبار کر. ئەسەد دیار کر کو ئەردۆگان شەرا گەرم دکەت دا کو سەرنجا خەلکێ ترکیێ ژ سەر ئاریشەیێن ناڤخۆ بکێشیت، ب تایبەت پشتی کو تێکەلیێن وی دگەل داعشێ ئاشکەرا بووی.

ھەروھا ئەسەد ئیددیعا کر ھەرکەس دزانیت کو داعشێ نەفتا سووریێ ب رێیا ترکیێ و پاراستنا ئەمریکایێ دفرۆت.

د 27ی ئیلۆنێ دا ل قەرەباخێ شەر د ناڤبەرا ئازەربایجان و ئەرمەنستانێ دا دەرکەت و وەلاتێ ئەرمەنستانێ و گەلەک چاڤکانیێن ل ھەرێمێ پشتراست دکەن کو ترکیێ چەکدارێن ئۆپۆزیسیۆنا سووریێ ڤەگوھەستنە ئازەربایجانێ و د شەرێ ل دژی ئەرمەنستانێ دا بکار دئینیت.

ژ لایەکێ دی سەرۆکێ ئازەربایجانێ ئیلھام ئالیەڤ ژی ھاتنا چەکدارێن سووریێ بۆ ئازەربایجانێ و بەشداریا وان د شەر دا رەد دکەت.