رووسا سەبارەت ئەگەرا سەرخوەبوونا رۆژئاڤایێ کوردستانێ دلگرانە

رووسا سەبارەت ئەگەرا سەرخوەبوونا رۆژئاڤایێ کوردستانێ دلگرانە

رووسیا سەبارەت پشتەڤانیکرنا ژ کوردێن رۆژئاڤا کوردستانێ رەخنەیان ل ئەمریکایێ دگریت و تەکەزیێ ل سەر پاراستنا ئێک پارچەئییا ئاخا سووریێ دکەت.

وەزیرێ کارێن دەرڤە یێ رووسیایێ سێرگی لاڤرۆڤ، ژ بەر وان تەدبیرێن ل سووریێ ئەمریکا دگریتە بەر خوە هوشداریێ ددەت ژ “تەقینا” پرسگرێکا کوردان و تەکەز دکەت کو پێویستە رێگری ل پێشێلکرنا یەکپارچەئییا ئاخا سوورێ بهێتە گرتن.

لاڤرۆڤ د کۆنفەرانسەکێ رۆژنامەڤانی دا رۆژا دوشەمبی 5/10/2020ێ گۆت: ئەمریکا دخازیت دەڤەرەکا ئۆتۆنۆمی ژ بۆ کوردان “ل باکورێ سووریێ” دروست بکەت، کو دەستهلاتا وێ وەکو دەستهلاتا دەولەتەکی بیت. لاڤرۆڤ هەر وەها راگەهاند: “وەکو دهێتە زانین ئەو (ئەمریکا) هەول ددەت ترکان رازی بکەن، داکو رێگریێ ل وێ پێنگاڤێ نەکەن”.

ناڤبووری بەردەوام کر و راگەهاند: یاری کرن ب ئێکەتییا ئاخا وەلاتەکێ دی، بن پێ کرنا ئاشکەرا یا یاسایێن ناڤ نەتەوی یە. د ڤێ حالەتێ دا ژی ئەڤ مژارە ب تەنێ یا تایبەتمەند نابیت ب سووریێ ڤە، بەلکو گرێدایی پرسگرێکا کوردانە و دهێتە جیبجیکرن، کو دبیت ب رەنگەکی بهێز بتەقیت و ئەو رەوشا نها ب هەڤبەرکرن د گەل وی دەمی دێ گەلەک کێمتر جدی بیت”.

لاڤرۆڤ راگەهاند، پرسگرێکا کوردان گرێدایی هەژمارەکا زێدە یا وەلاتێن رۆژهەلاتا ناڤینە و هوشداری دا: بانگەوازی کرن ژ بۆ جوداخوازیێ یان ژی جیبجیکرنا وێ ب رەنگەکێ چالاک، دبیت پێشهاتێن گەلەک خراب ل دووڤ خوە بینیت. پێویستە جارەکا دی ئاماژە ب ڤێ چەندێ بکەین کو ڤان کاران هەموویان دەولەتەک ئەنجام ددەت کو دکەڤیتە پشت بەحران، لێ بەلێ دێ دەولەتێن ناڤچەیێ و ئەورۆپا سەرەدەریێ دگەل پێشهاتێن وێ کەن، هەر وەها ئەم ژی نزیکین ژ وێ ئاخێ”.

کانالێ “رووسیا ئەلیەوم”، کو داخۆیانییا لاڤرۆڤ ڤەگوهاستیە دبێژیت: هێزێن سیاسی یێن کورد مژوولی دروستکرنا ئۆتۆنۆمیەکێ نە ل رۆژهلات و باکورێ رۆژهەلاتێ سووریێ و یەکینەیێن پاراستنا گەل “هەپەگە”، کو ژ لایێ ئەمریکایێ ڤە دهێنە پشتەڤانیکرن، رووبەرەکێ زێدە یێ ئەردی کۆنترۆل کریە، و دەستهلاتدارێن سووریایێ ڤێ خواستەکا کوردان ب توندێ رەد دکەن و ترکیا ژی ب هەمان ئاوا.

رووسیا چەندین جاران تەکەز کریە، پشتەڤانییا دانوستاندنێن هێزێن کوردی و دەستهلاتدارێن سووریێ دکەت سەربارەت ئاییندەیێ سووریایێ، و تەکەز کریە کو کوردێن رۆژئاڤا بەشەکێ نە ڤەقەتیایی ژ گەلێ سووریێ نە.