بابێ وێ کێر ل چاڤێن وێ دایە

بابێ وێ کێر ل چاڤێن وێ دایە

خاترە پۆلیسەکا ژن یا ئەفغانستانێ یە کو بابێ وێ ئەندامەکێ تالیبانێ یە. خاترە دبێژیت، بابێ من ب تاوانا “پۆلیس بوونێ” کێر ل چاڤێن من دایە و چاڤێن من گەلەک بریندار کرینە.

مەسعوود ئەندرابی سەرپەرشتێ وەزارەتا کارێن ناڤخوە یێن ئەفغانستانێ د ئۆفیسا خوە یا کار کرنێ دا هەڤدیتنەک دگەل خاترە یێ ئەنجامدا و ئەو ب “پۆلیسا وێرەک” ب ناڤ کر.

ئەندرابی د تویتەکێ دا نڤیساند، شقەیەک ب خاترە یێ دایە و سۆز دایە کو برینێن وێ دەرمان بکەت. ئەندرابی بەردەوام کر، گرووپا تالیبانێ نەشێت ب زولمێ گەلێ ئەفغانستانێ بشکێنیت.

هەر د ڤی دەمی دا، تارق ئاریان بەردەڤکێ وەزارەتا کارێن ناڤخوە یێن ئەفغانستانێ د تویتەکێ دا نڤیساند: “ب تەنێ ئێک خاترە نە، ب دەهان خاترە ژ لایێ تالیبانێ یان هاتینە گولەبارانکرن یان ژی د ئیشکەنجەیان دا نەفەس کێشایە. بابێ وێ ژی کو هەم فکرێ تالیبانێ یە، چاڤێن خاترێ ب تاوانا پۆلیس بوویینێ کورە کرینە”.

ئەڤە د دەمەکێ دا یە کو حەتا نها تالیبانێ هیچ داخویانیەک ل سەر ڤێ مژارێ نەدایە.

هێژایی گۆتنێ یە کو ل گۆر راپۆران، د نها دا پێتری 3 هەزار ژنان د چارچووڤێ وەزارەتا کارێن ناڤخوە یێن ئەفغانستانێ و پێتری 2 هەزار ژن د چارچووڤێ وەزارەتا بەرگری یا ڤی ولاتی دا فەرمانبەرن کو ب تەڤاهی ژ 5 هەزار ژنێن ئەفغان د بیاڤێن جودا یێن لەشکری و ئەولەهی یا ڤی وەلاتی دا کار دکەن.