تركیێ «ملیتانێ ئاپۆی» كوشت
«عه‌گید جڤیان»، فه‌رماندارێ به‌رز یێ په‌كه‌كێ ل باكورێ كوردستانێ كه‌ته به‌ر هێرشه‌كا سوپایێ تركیێ هات كوشتن، فه‌رماندارییا نه‌په‌گێ ب داخویانییه‌كا فه‌رمی مرنا وی راگهاند.
ل گۆر ئاگاهیێ ده‌ستێ مه، فه‌رماندارێ په‌كه‌كێ «عه‌گید جڤیان» ب كۆد ناڤێ «ڤاهده‌تین كارای»، ل هه‌رێما بۆتانێ یا باكورێ كوردستانێ د هێرشه‌كا سوپایێ تركیێ دا ل 11 مه‌ها رابووری هاتییه هه‌ده‌ف كرن.
ل ڤێ ده‌ربارێ دا فه‌رماندارییا ب ناڤێ بریارگه‌ها ناڤه‌ندی یا پاراستنا گه‌ل نه‌په‌گه، د داخۆیانییه‌كا نڤیسكی دا گیان ژ ده‌ست دانا فه‌رماندارێ خۆ «عه‌گید جڤیان» راگهاند و ده‌ست نیشان كر كو ئه‌و ل مه‌ها رابووری د هێرشه‌كا سوپایێ تركیێ دا ل باكورێ وه‌لات ل گه‌ل دوو گه‌ریلایێن دی هاتییه هه‌ده‌ف كرن.
نه‌په‌گێ ئاشكرا كر، فه‌رماندار «عه‌گید جڤیان» ل دۆربه‌را وانێ هاتییه هه‌ده‌ف كرن، گه‌ریلایێن كو ل گه‌ل دا بوون ناڤێ وان ئه‌ڤه‌نه: «ته‌كین یلدرم و خه‌لیل كاڤۆس».
د به‌شه‌كێ داخویانییا فه‌رماندارییا نه‌په‌گێ دا هاتییه كو «فه‌رماندار عه‌گید و هه‌ڤرێیێن وی ب روحا فه‌دایی یا ئاپۆی هێرشی دوژمن كرن و پاش شه‌ره‌كی گران ئه‌وان گیان ژ ده‌ست دا».
پرسا سه‌ره‌كی ل ڤێرێ ئه‌ڤه‌یه، گه‌لۆ ئه‌و كیژان روحا فه‌دایی یا رێبه‌ر ئاپۆیه نه‌په‌گه باس ژێ دكه‌ت، ژ به‌ركو وه‌ختا ئاپۆ هاتییه ده‌سته‌سه‌ر كرن و هێژان د باله‌فرێ دا و به‌رییا كو چ زه‌خته‌ك ل سه‌ر بهێته كرن ته‌سلیم بوو و ب ئه‌فسه‌رێن هێزێن تایبه‌ت گۆت «ئه‌ز ژ بۆ خزمه‌تا ده‌وله‌تا تركیێ» ئاماده‌مه، هه‌روه‌ها یه‌كه‌م گۆتنا ئاپۆ ل دادگه‌هێ ئه‌ڤه بوو: «دایكا من تركه، رێ ب من بده‌ن خزمه‌تا ده‌وله‌تا تركیێ بكه‌م»، له‌وما هه‌گه‌ر فه‌رماندار «عه‌گید جیڤیان» ب روحا فه‌دایی یا ئاپۆی شه‌ر كربا، دا ته‌سلیم بیت و به‌رخوه‌دان نه‌دكر.
تێ زانین عه‌گید جڤیان خه‌لكێ گه‌ڤه‌را ناڤچه‌یا جۆله‌مێرگێ یه، ل سالا 1995ێ ته‌ڤلی په‌كه‌كێ بوویه، ئه‌رك و به‌رپرسیاریێن گرنگ یێن سه‌ربازی و په‌روه‌رده‌یی وه‌رگرتینه، نه‌په‌گێ ئه‌و ب «میلیتانێ ئاپۆی» ناڤ كرییه.
