جه‌نگا «پردێ» ده‌رسا كو خائین و داگیركه‌ر نه‌شێن ژبیر بكه‌ن

جه‌نگا «پردێ» ده‌رسا كو خائین و داگیركه‌ر نكارن ژبیر بكه‌ن

د دیرۆكا گه‌لێ كورد دا‌ رۆژێن پڕ سه‌روه‌ری هه‌نه‌، ئیرۆ ژی كو دبیته‌ 20 جۆتمه‌هێ یه‌ك ژ وان رۆژانه‌ كو پێشمه‌رگه‌یێن كوردستانێ رومه‌ته‌كا پڕ مه‌زن تێدا‌ ژ بۆ گه‌ل تۆمار كرییه‌، وه‌ختا كو دفنا دوژمنی و داگیركه‌ران شكاندی و سنۆره‌ك ژ بۆ خائینان دانی.

پاش 16 ئۆكتۆبه‌رێ پێشمه‌رگه‌ی دزانی دوژمن ناراوه‌ستیت

پاش خیانەتا ١٦ێ ئۆکتۆبەرا سالا 2017ێ کو ژ ئالیێ گرۆپەکێ خائین د ناڤ یەکێتیێ داهات ئەنجام دان و تێدا‌ بەشەکێ هەری مەزن یا خاکا کوردستانێ ژ ده‌ست چوو و میلیشیایێن حەشدا شەعبی و هێزێن داگیركه‌ر كه‌تن تێدا‌، نیازا سەرەکی یا ڤێ خیانەتێ ب زەلالی دەرکەت هولێ.

لهاڤهاتنا 16 ئۆكتۆبه‌رێ كو خائینێن ناڤخوه‌ ل گه‌ل ئیراق و ئیرانی پێكئینا بوو، ئارمانجا وێ نه‌ تنێ داگیركرنا دلێ كوردستانێ بوو، لێ به‌لێ وان د خوا‌ست ستاتۆیا باشوور ب ته‌ڤاهی بهێته‌ ژناڤبرن، له‌وما دەریێن سنۆر ھاتن قەپات کرن، دۆرپێچا سیاسی و ئابووری ل سەر باشوورێ ولات ھات دانان، لێ د ڤان دەمان دە پێشمەرگەیێن کوردستانێ ئامادەکاری دكر، وان دزانی دوژمن ناراوه‌ستیت، وان دزانی خەتەرەکا مەزن ل سه‌ر نیشتیمانێ شرین هه‌یه‌.

مەسعوود بارزانی ل ڤێ قۆناخێ ھێزێن پێشمەرگەی ژ بۆ پاراستنا سنۆرێن باشوورێ کوردستانێ کۆم کرن، داگیرکەران دڤییا ژ سێحلا و پردێ هێرشا 16 ئۆكتۆبه‌رێ به‌رده‌وام بكه‌ن، لێ بەلێ پێشمەرگەیان بەرخوەدانەکا بێ ھەمپا کر، وان ل پردێ تانکێن ئابرامز یێن داگیرکەران تەقاندن، ب سەدان میلیشیا و چەکدارێن وان کوشتن و نه‌هێلا ل پردێ و سحێلا بکەڤن د خاکا کوردستانێ دە.

پێشمه‌رگه‌ی  خه‌یالا خائینان ژناڤبر

ب هاریكاری و چاڤساغییا گرۆپا «کالفامان» حەشدا شەعبی ل رۆژا 20 جۆتمه‌ها 2017ێ  دخواست ژ ئالیێ باژارۆکێ پردێ ب بەهانەیا سەپاندنا یاسایێ هێرشی سەر پایتەختا باشوورێ ولات بکه‌ن و ستاتۆیا باشوور ب تەمامی ژناڤ ببه‌ن، لێ بەلێ پێشمەرگەهێن کوردستانێ ل ڤێرێ دەرسەک وه‌ها ب خائین و دژمنان دا کو ئەو ب توندی پاشڤە برن و ئەڤ خەیالا وان ژناڤبر.

جه‌نگا پردێ ب گوللـه‌ تۆپه‌كێ کو سپایێ پاسداران تەقاند ده‌ستپێكر، لێ ئەڤ جه‌نگ ب تێکشکاندنا تانکا (ئابرامز ئێم وەن) یا ئەمه‌ریکی کو یەک ژ بهێزترین و پێشکەتی ترین تانکێن سەربازی یێن جیهانی یه‌ و کوشتنا ب سەدان میلیشیا و ته‌قاندنا ب دەهان هامەر و باجەرێن داگیرکه‌ران ب داوی هات.

ل گور زانیاریێن پێگه‌ها دارکا مازی د ڤی شەری دە هێزەکا خائینان کو سەر ب لاهۆر شێخ جەنگی و هێزەکا مەلبەندێ یه‌كێتییا نشتیمانی هاریكارییا داگیرکاران دکر و ئاگاهی ل سەر ئه‌نیێن پێشمەرگەی ب دژمنان د دا و ئەڤ یەک بۆ ئه‌گه‌را شەهیدکەتنا ب دەهان پێشمەرگەهان د ڤی شەری دا.

مەدیایێن سەر ب ڤێ گرۆپا (کالفامان) و بەشەک ژ مەدیایێن کو ل ژێر ناڤێ مه‌دیا ئازاد، شەرەکی تایبەت یێ هەری چەپەل ل دژی پێشمەرگەهان دەستپێکر و ل ئالیێ دژمن رۆمالا شەر دکرن، ڤان مەدیایا هەول ددا ب نووچەیێن نەراست هاریكارییا داگیرکاران بکه‌ن و ورەیا پێشمەرگەهان بشكێنن، جارن دگۆت كو (قوشتەپە هات داگیر کرن) جاران دگۆ (مالباتا بارزانی بەر ب ترکیێ رەڤیان) جاران دگۆ (پێشمەرگەیێن سەر ب پارتی باژارۆکێ پردێ بۆمبەباران دکه‌ن) و جاران (پێشمەرگەهێن پارتی ب رەنگەکە پر دویر ژ ئینسانیەتێ ره‌فتارێ دگەل ب دیلێن حەشدێ دکه‌ن) کو ئەڤ هەموو ب تنێ ژ بۆ هاریكارییا دژمن و بێ مۆرال کرنا پێشمەرگەهان دهات گۆتن، گەر وه‌ها نه‌به‌، ئەرێ بۆچی  وان ل سەنگەرێن دژمن ئەڤ شەرێ تایبەت دكر؟.

جه‌نگا پردێ وه‌ك رۆژه‌كا‌ پری سه‌روه‌ری چوو د دیرۆكێ دا

پێشمەرگەهێن کوردستانێ د جه‌نگا پردێ دا‌ و د دەما 8 ده‌مژمێران دا 6 هێرشێن دژمن تێکشکاندن و ب دەهان جه‌سه‌دێن چەکدارێن میلیشیایێن حەشدا شه‌عبی د مه‌یدانا شەر دا مان.

د ڤان ده‌مان ده‌ هێزه‌كا‌ حەشدا شەعبی و سپایێ پاسداران و میلیشیایێن سەر ب حزبوللا کو ل هیران و نازەنینان ل به‌ندا تێکشکاندا ئه‌نیێن پێشمەرگەی بوون ل پردێ، پاش کو زانی کو ئەو ئه‌نی ناهێن تێکشکاندن ب نەچاری پاشڤه‌ زڤرین و پیلانا ژناڤبرنا ستاتۆیا باشوورێ کوردستانێ ئه‌وا ب هاریكارییا (کالفامێن) د ناڤا یه‌نه‌كێ دا‌ هاتبوو دانان راستی شکەستنێ هات، ئەڤ یەک ژی ب خوینا چەندین پێشمەرگەهێن کوردستانێ بوو.

هێژایێ گوتنێ یە کو هێزەکا پێشمەرگەهێن پارتییا ئازادییا کوردستانێ ب سەرکرداتییا حسێن یەزدان پەنا بەشداری ڤێ داستانێ کرن و رۆلەکێ هەری بەرچاڤ د شەری دا هەبوو.

جه‌نگا پردێ ئه‌وا داگیركه‌ران ب گۆللـه‌ تۆپه‌كێ ده‌ستپێكری، جانفیدایێن كوردستانێ ب سترانا «ها گولا ته‌مه‌» ب داوی ئینا، وان شكۆ ژ بۆ گه‌ل ڤه‌گه‌راند، ده‌رسه‌ك‌ نیشا خائین و دوژمنان دا و پردێ وه‌ك‌ رۆژه‌كا پڕی سه‌روه‌ری كره‌ د دیرۆك و بزاڤا رزگاریخوازییا كوردستانێ دا.