به‌رپرسێ ئیستخباراتا مه‌تینی یێ په‌كه‌كێ هات كوشتن

«دارا كاتۆ» به‌رپرسێ ئیستخباراتا په‌كه‌كێ یێ چیایێ مه‌تینی كه‌ت به‌ر ئێریشه‌كا ده‌وله‌تا تركیێ و هاته‌ كوشتن.

وه‌زاره‌تا به‌رگرییا تركیێ د به‌یانه‌كا نڤیسكی دا كو ئه‌ڤرۆ رۆژا سێشه‌مبێ 20/10/2020ێ به‌لاڤ كرییه‌، ئه‌شكه‌ره‌ كر، «ئه‌حمه‌د بال» به‌رپرسێ ئیستخباراتا په‌كه‌كێ ل چیایێ مه‌تینی كو د بۆلته‌نا ره‌نگ سۆر یا ده‌وله‌تێ دا یه‌، د ئێریشه‌كێ دا هاته‌ كوشتن.

ده‌ست نیشان كر، ئه‌حمه‌د بالێ یێ ب كۆد ناڤێ دارا كاتۆ د ده‌ما جڤینه‌كێ دا ل گه‌ل 4 چه‌كدارێن په‌كه‌كێ هاتییه‌ هه‌ده‌ف كر ن و هه‌ر هه‌موو هاتنه‌ كوشتن.

ل گۆر به‌یانا وه‌زاره‌تا به‌رگریێ یا تركیێ، ئه‌حمه‌د بال ل سالا 2009ێ ته‌ڤلی په‌كه‌كێ بوویه‌ و حه‌تا سالا 2015ێ ل باكورێ كوردستانێ بوو و ئه‌ركێن به‌رپرسیاریێ د ناڤ یه‌كینه‌یێن پاراستنا سڤیل دا وه‌رگرتینه‌، پشتره‌ ل سالا 2018ێ ده‌رباسی رۆژئاڤا كوردستانێ بوویه‌، ل ناڤه‌راستا ئیسالێ ژی ئه‌ركێ به‌رپرسیارییا ئیسخباراتا چیایێ مه‌تینی وه‌رگرتییه‌.

پارتییا كاركه‌رێن كوردستانێ چ ئاگاهی ل ده‌ربارا كوشتنا به‌رپرسێ ئستخباراتا چیایێ مه‌تینی نه‌دانه‌ و ئه‌ڤ ئاگاهیێن ده‌وله‌تا تركیێ ژی نه‌دره‌واندنه‌.