ژ بازرگانیا ئاخێ بەر ب بازرگانییا سەرووپێکا!

ژ بازرگانیا ئاخێ بەر ب بازرگانییا سەرووپێکا!

پشتی کو یەک ژ ئەندامێن ئەنجوومەنا پارێزگەها سلێمانیێ ب ناڤێ “محەمەد شێخ وەهاب” کو سەر ب بزاڤا گۆرانە ب سەختەکارییا فاتۆرەیان “وەسلەیا” ل دەریێ سنۆری یێ پەرویزخان هاتیە تاوانبارکرن، ناڤبووری چەند رۆژان بەرزە بوو، لێ پشتی وەرگرتنا تەعلیماتان ژ لایێ بەرپرسێن خۆ کو ئەو کار ب وی دایە ئەنجامدان ئەڤرۆ چوو دادگەها کەلار و هاتە بنچاڤکرن.

ل گۆر زانیاریێن پێگەها دارکا مازی ل باشوورێ کوردستانێ محەمەد شێخ وەهاب دگەل گرووپەکێ 40 کەسی ب پشتەڤانییا راستەوخۆ یا لاهۆرێ شێخ جەنگی هەڤسەرۆکێ ئێکەتیێ هەژمارەک گەلەک زێدە ژ فاتۆرەیان ل دەریێ سنۆری یێ پەرویزخان سەختە کرینە کو بوهایێ وان دگەهیتە نێزیکی دەهان ملیۆن دۆلاران.

پشتی دەرچوونا بریارا دەستەسەرکرنا ناڤبووری ژ لایێ دادگەها سلێمانیێ ڤە، ناڤبووری رەڤییابوو و چەندەکی خوە ل کەرکووکێ ڤەشارتبوو، لێ بەلێ پشتی چەندین رۆژان و پاش کو لاهۆرێ شیخ جەنگی گارانتی دای وی کو ناهێلیت هیچ زەرەرەک ل وی و بابێ وی بکەڤیت، ئەڤرۆ چوویە دادگەها کەلار و دادگەهێ بریارا گرتنا وی دەرکریە.

 هەرچەند هەژمارا کەسێن ب سەختەکرن و کارێ قاچاخچیتیێ هاتیە سووچبارکرن دگەهنە 40 کەسان لێ حەتا نها ب تنێ 20 کەس هاتینە دەستەسەرکرن، د نها دا کەسێن کو ئەڤ سەختەکاریە ب ڤان کەسان دایە ئەنجامدان هەول ددەن ب هەموو رەنگەکێ هاریکارییا ڤان تاوانباران بکەن داکو روویێ وان یێ راست ئاشکەرا نەبیت، ژبەرکو هندەک ژ وان کەسێن هاتیە گرتن دانپێدان کریە کو هندەک بەرپرسێن بلند یێن ئێکەتیێ ل پشت ڤی کارێ وان دا نە.

ئەڤە جارا یەکەمین نینە کو باس ل قاچاخچیتی و سەختەکاریان ل دەریێ سینۆری یێ پەرویزخان دهێتە کرن، پێش نها ژی “عەلی حەمە سالح” پەرلەمانتەرێ بزاڤا گۆران د پەرلەمانێ کوردستانێ دا چەندین جاران باس ل ڤان کاران کربوو وراگهاندبوو هندەک بەرپرسێن پارتی و ئێکەتیێ ل دەریێن سینۆری مژوولی کارێ قاچاخچیتیێ نە لێ دیار بوو کو هندەک ژ بەرپرسێن بزاڤا گۆران ژی یێن کەتی بن باندۆرا لاهۆرێ شێخ جەنگی و کارێ قاچاخچیتیێ و سپی کرنا دراڤی دکەن، ل دوماهیک جار عەلی حەمە سالح راگهاندبوو کو نها خاچاخچیتیەک گەلەک سەیر دەرکەتیە ئەو ژی قاچاخچیتیا “سەرووپێکان” کو کەس ژی خۆ لێ ناکەت خۆدان.

وەها دیار دبیت کو ب فرۆتنا 51٪ ژ ئاخا کوردستانێ ل 16ێ ئۆکتۆبەرا سالا 2017ێ ژ لایێ لاهۆرێ شێخ جەنگی ڤە هێشتا ژ پارە تێر نەبوویە، یانژی ئاغایێن لاهۆر پارەیێ وی ب دروستی رادەستی وی نەکریە کو نها قاچاخچیتیێ ب سەرووپێکێن حەیوانان دکەت.

ژ بازرگانیا ئاخێ بەر ب بازرگانییا سەرووپێکا!