ئەنجوومەنا ئاساییشا ھەرێما کوردستانێ داخویانییەک بەلاڤ کر و تێدا راگەھاند کو 3 گرووپێن جودا یێن تیرۆرستی ھاتنە دەستەسەر کرن و یەک ژ ڤان کۆمان گرێدایی په‌كه‌كێ یە، داخویانییا ئه‌نجوومه‌نا ئاساییشێ نه‌تنێ رێ ل 3 کریارێن تیرۆرستی گرت، بەلکو د ھەمان دەم دا روویێ راست یێ په‌كه‌كێ و ئاستا خیانەتێ یا کو «تفاقا په‌كه‌كێ – ئێکەتیێ» ل باشوورێ کوردستانێ دشێت ب وێرەکی بکەت، ئاشكرا کر.
داخویانییا ئەنجوومەنا ئاساییشێ کو رێ ل کریارێن تیرۆرستی گرتییه، داخویانییەکا چاڤەرێکری بوو، ژبه‌ركو حکوومەتا ھەرێما کوردستانێ ژ هه‌موو ئالییان ڤە ب دوژمنان ھاتییە دۆرپێچ کرن و ژ ھەمیێ خرابتر و مەترسیدارتر ئەو دوژمن د ناڤ سنۆرێن کوردستانێ دا خودان ھەڤکارێن مەزنن، ژ بەر ڤێ چەندێ، رەوشەکا ب ڤی رەنگی نەیا سه‌یر بوو.
په‌كه‌كە عاجزە کو ناڤێ وێ د ناڤا ڤان بوویەران دا هاتییه
رۆژەکێ پشتی داخویانییا ئەنجوومەنا ئاساییشا ھەرێمێ، کۆمیتەیا په‌یوه‌ندیێن دەرڤە یا په‌كه‌كێ راگەھاند کو ئەو تاوانێن ڤێ بوویەرێ ل سەر خوە قەبوول ناکه‌ن، گەر په‌كه‌كێ داخویانییەک وه‌ھا نەدا با دا ھەموو کەس حێبه‌تی مینن، ژ بەر کو نەدیارە کا په‌كه‌كه دێ چ قەبوول كه‌ت ئان ژی قەبوول ناکەت، په‌كه‌كێ كو دیرۆكه‌كا گەلەک خراب هه‌یه، هه‌ر كه‌سه‌كی چاڤه‌رێیا به‌رسڤه‌كا ب ڤی رنگی ژێ دكر.
په‌كه‌كێ د ناڤا ھەولێرێ دا، کارمەندەکێ کۆنسۆلخانەیا ترکیێ كوشت، رێڤەبەرێ په‌كه‌كێ باھۆز ئەردال وەک فێسبووكچییا دەرکەفت و گۆت: «مە ئەڤ چالاکییه نەکرییە، لێ دەست و زه‌ندێن وان یێن کو ئەو کار کرین خۆش بن»، دو رۆژا پاش بوویه‌رێ دیار دبیت کو پیلانا بوویەرێ ل قەندیلێ ھاتییە دارێشتن، رێخستنا «TAK» کو راستەراست ب موراد قارایلان ڤە گرێدایە، ل 31ێ چریا ئێکێ یا سالا 2010ێ ل جاده‌یا ته‌قسیم ل ستەنبۆلێ هێرشه‌كا خوەکوژی كربوو، موراد قارایلان بخۆ گازی کەسێ چالاکڤان دکەت و وی دهنێریته چالاکیێ، د ئەنجاما چالاکیێ دا، 15 کەس پۆلیس و ١٧ سڤیل ٣٢ کەس بریندار دبن، د ڤی سەردەمی دا، د ناڤبەرا په‌كه‌كێ و دەولەتا ترکیێ دا ئاگربەست ھەبوو، په‌كه‌كە -كه‌جه‌كه بلەزگینی داخویانییەكێ به‌لاڤ دكه‌ت و چالاکیێ شەرمەزار دکەت و ئەو دبێژن: «ئەم کەسێن ئه‌ڤ چالاكیە ئەنجام دای و چالاکیێ بخوە ژی، ب ئاشکەرا شەرمەزار دکه‌ین«.
ئەم ژ چەند میناکان دزانین کو د ناڤبه‌را تشتێ كو په‌كه‌كە دکەت و یا کو دبێژیت ھەڤنەگرتنەکا مەزن ھەیە، ئەم دزانین کو ئەو ب گۆتنا خۆ نەجھێ باوەریێ نە، ژ حیزبەکا وەک په‌كه‌كێ كو ل سەر بەرژەوەندی پەرستیێ ئاڤابوویه پره‌نسیپ، ره‌وشت، دروستی و زەلالی ناهێن پێشبینی كرن، وەکی دی، ھەولدانێن په‌كه‌كێ یێن ئاژاوه‌یی ل دژی باشوور تشتەکە کو ژمێژیە، د رۆژەڤێ دا یە، ب تایبه‌ت ئەو ب خوە دبێژن، ئەم دێ ل ھەر جھەکی چالاکییان ئەنجام دەین، ھەر کەسێ دگه‌ل ترکیێ کار دكه‌ت، ئارمانجا مەیە، ھەموو کەسێن کو دگه‌ل داگیرکەران كار دكه‌ن ئه‌م دێ كوژین، ب ڤی رەنگی، دڤێن جەوەکێ وەک فلمێن ئەكشن ل باشور چێكه‌ن.
ئارمانجا په‌كه‌كێ ئەوە کو دیرۆکێ دوبارە بکەت، مینا سالا 1997ێ، دگەل ئێکەتیێ و ئیرانێ دا، باژارێن کوردستانێ ب دەست خۆ بێخیت.
ئەڤجا، تنێ تشتەک دشێت په‌كه‌كێ خلاس بکەت ئەو ژی نەئارامکرنا باشوورێ کوردستانێ و رۆژئاڤایێ کوردستانێ یە، ژبەرکو په‌كه‌كە تەڤگەرەکە ل سەر بنگەھەکێ پۆپۆلیستی ئاڤا بوویە، ئەو ژ ھەر جۆرە کریارێن ئاژاوەگێری و چالاک را ڤەکرییە، ژبەرکو ئەو نەسەقامگیری و فەوزایا کو ل باشوور دایە دەست پێ کرن ژ بۆ خۆ وەک ئەرکەکێ گەلەک پیرۆز دبینیت، بێ گومان، ئەڤه نە تنێ ژ بۆ په‌كه‌كێ مژارا ژیانێ یە، ب راستی، ڤێ گاڤێ، ئیران- ئێکەتی، لاھۆر جەنگی و په‌كه‌كێ ژ بۆ ھەبوونا خۆ گرنگ دبینیت کو باشوورێ کوردستانێ بکێشیتە ناڤ شەر و نە ئارامیێ.
ژ بەر ڤێ ئه‌گه‌رێ، د بنگەھێ ڤان کارێن ئالۆزکەر دا پێدڤییه ئەم 3 ھێزان ببینین.
لاھۆر جەنگی ئێکەتی بەرەڤ کو دەرێ بر؟
دەما کو په‌كه‌كێ داخویانیەک دای و گۆتی کو مە چ پەیوەندی ب وان گرۆپان ڤە نینە، ئێکەتیێ داخویانیەک دا و گۆت ئاگاھییا مە ژ داخویانییا ئەنجوومەنا ئاساییشا ھەرێما کوردستانێ نینە، ئەڤ داخویانییە تشتەکە دھاتە پێشبینی کرن، ژبەرکو په‌كه‌كە و ئێکەتی خودان پلانسازییەکا ھەڤبەشن ژ بۆ بێ ئارمانج کرنا حکوومەتا ھەرێما کوردستانێ و کێشانا وێ بۆ ناڤ شەری دا، بێ گومان دێ داخویانیێن وان ژی ئێك بن.
د ناڤبەرا ئێکەتیێ و په‌كه‌كێ دا د ئاستێ دابەشکرنا ئیستخباراتی و ئۆپەراسیۆنی دا رێکەفتنەک ھەیە، ھەردوو ھێز ل باشوور دگەل ئێک کار دکەن، د راستیێ دا، ئەڤە ژ بوویەرا ھۆكەبازێ و هێڤە ب ھەموو شێوازان دگەل هەڤ کار دکەن، دەما کو کەسێ نەدزانی ل هۆكەباز چ قەومی یە، راگەهاندنێن بنگەھێ وان ل سلێمانیێ راگەھاند: «کەسێن ژ مالباتا بارزانی د خوارنگەھێ دا ژ بۆ پارا شەر کرییە، ترکەک ھاتییە کوشتن» د ھەمان دەمی دا، دەزگەھێن راگه‌ھاندنێ یێن سلێمانیێ یێن ب سەر په‌كه‌كێ دخواست تێگھشتنەکێ ئاڤا بکەن کو پارتی و مالباتا بارزانی ئەڤ بوویەرە ئەنجام دایە، ئه‌گه‌را کو ھەردوو دەزگەھێن میدیایی زوو زوو کا دێ چ داخویانییان بدەن دیار دبیت کو بەروەخت ئامادە بوونە، کەسێ کو دگەل کاربدەستێ کۆنسولخانێ ل سەر مێزەکێ روونشتی ژ سلێمانیێ ھاتبوو، ژبەر ڤێ چەندێ کەسێ ب مەھان ل دووڤ کارمەندێ کۆنسۆلخانەیێ نەگەریا بوو و ھەر رۆژ نە ل وی جھی بوو یێ لێ ھاتییە کوشتن، خاباتکارێ کۆنسۆلخانێ وێ رۆژێ ژ بۆ وی جھی ھاتبوو راکێشان.
لەوما ئێکەتیێ دخواست کو ژ په‌كه‌كێ پتر ڤێ بوویەرا هۆكەبازێ ڤەشێریت، بێ گومان، رۆژەکێ تشتێ کو ل وێ خوارنگەھێ قەومی دێ هێتە نڤیسین، وەکی دی ل تەباخا 2017ێ، دێ مژارا گرتنا میتێ ل سلێمانیێ هێتە نڤیسین، ھەروه‌ھا دێ خیانەتا کەرکووکێ یا 16ێ ئۆکتۆبەرێ دا کو کەرکووک تێدا پێشکێشی حەشدا شەعبی کرن ژی دێ هێتە نڤیسین، ب کورتی، دێ دیرۆکا ھەڤکارییا قرێژ یا د ناڤبەرا ئێکەتیێ و په‌كه‌كێ دا هێتە نڤیسین.
شاھدێ ریڤی کورییا وی یە، ئێکەتییا لاھۆر جەنگی ژی شاھدێ په‌كه‌كێ یە
ئێکەتیێ ئاشکەرا کر کو ئه‌و ژ ئۆپەراسیۆنا ئەنجوومەنێ ئاساییشا کوردستانێ یا ڤێ دوماهیێ بێ خەبەر بوویە، ئەڤ چەندە گەلەکا باشە، ژ بەرکو ئەگەر ئاگاھییا لاھۆر جەنگی ژی ڤی ئۆپەراسیۆنێ ھەبا ئەڤ ئۆپەراسیۆنە سەر نەدکەفت و ئەنجام ب دەست خۆ ڤە نەدئینا، ژبەرکو نەدیار بوو لاھۆر جەنگی دا ڤان ئاگاھییان فرۆشیتە کێ.
ئەڤ ئۆپەراسیۆنا دوماهیێ ھەمی ب ئاگەھدارییا ئینتەرپۆلێ ھاتینە ئەنجام دان و په‌یوه‌ندیێن کەسێن بیانی ب دەرڤەی وەلاتی ھاتینە دیار کرن، داخویانییا ئەنجوومەنا ئاساییشا ھەرێما کوردستانێ گۆتنا گەلەک ب باوەرە، داخویانیێن مایی ئەون یێن کو دوژمناھییا ھەرێما کوردستانێ دکەن، ھەلبەت ئەم دزانین «شاھدێ ریڤی کورییا وی یە، ئێکەتییا لاھۆر جەنگی ژی شاھدێ په‌كه‌كێ یە»، لێ بەلێ ھەر تشت ئاشکەرایە، ئەڤ مللەتە ب ڤان سیناریۆیان ناهێتە خاپاندن.
