مەسعوود بارزانی سەرۆکێ پارتییا دیمۆرکاتا کوردستانێ ئیرۆ رۆژا دوشەمی 2/11/2020ێ بەرسڤا گەف و ئاخافتنێن رێڤەبەرێن پەکەکێ دا و راگەهاند نابە هەلوەستا مە یا حەرامکرنا شەرێ براکوژی ب شاشی وەرە شیرۆڤەکرن و هەول بێ دایین ئیرادەیەک چەکداری و نە قانوونی ل سەر گەلێ باشوور بێ سەپاندن.
ئەڤ ژی دەقا داخویانییا مەسعوود بارزانی یە:
ب ناڤێ خوەدایێ مەزن و دلۆڤان
ل ڤێ رەوشا ئالۆزا کو ناڤچە تێدا دەرباس دبە و ل ڤان ھەموو قەیرانێن روو ل وەلاتێ مە کریە، ب پێویستی دزانم داخواز ژ ھەموو کوردستانیەکی بکم کو ب ئاوایەکە راستبینیێ رووبروویێ ڤێ رەوشا نەگونجاڤ ببن و ل ئاستا بەرپرسیاریا دیرۆکی دا بن و بەرەڤ ئاساییکرن و نەھشتنا ئالۆزی و نەخوەشیان ھەنگاڤان باڤێژن. نھا کوردستان ژ ھەموو دەمەکێ زێدەتر پێویستی ب زارۆک و گەدەیێن خوەیێن دلسۆزە بۆ کو وەلاتێ خوە ژ نەخوەشی و پلانان بپارێزن.
دیرۆک شاھدیا ڤێ یەکێ ددە مە و شانازیێ دکین کو مە شەرێ کورد و کورد ھەرام کریە ژ بەر کو گەلێ کوردستانێ و مە ھەموو ئالیەک زەرەرەکە مەزن ژ شەر و نەیەکبوون و نەتەباییێ دیتیە.
لێ بەلێ نابە ئەڤ ھەلوەستا مە ب شاشی بێ تێگھشتن و ئیستیغلال کرن بۆ کو گەفا دەستھلاتا یاسایی یا ھەرێما کوردستانێ بێ کرن و ھەولا سەپاندنا ئیرادەیەکە چەکدارانە یا نەیاسایی ل سەر خەلکێ کوردستانێ بێ دایین. نابە ھەلوەستا حەرامکرنا شەرێ کورد و کورد ب وێ یەکێ بێ شیرۆڤەکرن کو ئارامی و ئاساییشا باژار و باژارۆک و گوندێن مە بێ تێکدان و وەلاتیێن مە بێنە نەچار کرن کو مال و وارێن خوە ب جیھ بھێلن و ببن قوربانی و ب نەحەق بێنە شەھید کرن و کەس ژی دەنگ نەکە.
پشتی ئێریشا درندانەیا تەرۆریستێن داعیش، پێشمەرگەیێن قەھرەمانێن کوردستانێ روو ل بەرەیێن شەرێ دژی تەرۆریستان کرن و گەلەک ل ناڤچەیێن سنۆری ڤالا کرن. ب مخابنیێ ڤە ژ وێ دەمێ ڤە ل شوونا وێ یەکێ کو پشتەڤانیا ئەزمونا ھەرێما کوردستانێ بکن، چەکدارێن پەکەکێ ڤان ناڤچەیێن سنۆری و پاشێ ھندەک ناڤچەیێن دی ژی داگیر کرن و خوە وەکی جیھگرێ حکوومەتێ سەپاندن و رێگریێ ل خەلکێ کرن مال و گووندێن خوە ئاڤادان بکەن و ئەگەر سەردانا ناڤچایێن خوە ژی بکەن باج و سەرانەیان ژ وان وەردگرن. بێگوومان ئەڤ رەفتار نە جھێ قەبوولکرنێیە. ھەلوەستا نشتمانپەروەرانە و وەلاتپارێزانە ب کرداری دیار دبە نەکو ب ئاخافتن و گۆتاران.
ل ڤر دا پێویستە ب بیرا وان بێ دەما ل دەستپێکا دەستپێکرنا ب چالاکیێن خوە بوون، مە ھەموو جوورەیەکێ ھەڤکاریا وان کرن. ئەوان ب بەرەڤاژیێ ڤە ھەلوەستەکە نەجامێرانە نیشان دا و پاشێ ل چەندین قۆناخان دا شەر ژی ل سەر مە دا سەپاندن و ل ئەنجامێ دا ئەم ھەموو ئالیەک زەرەرمەند بوویین.
باشترین ھەلوەست ل ڤێ دەمێ دا رێز گرتنە ل دەستھلاتا شەرعی و یاسایی یا ھەرێما کوردستانێ و ھەر وھا ڤالاکرنا وان ھەموو ناڤچەیانە کو ل رێیا سەپاندنا ھێزێن چەکداری ھاتنە داگیر کرن و ژ بۆ وەلاتیێن ھەرێما کوردستانێ بوونە جھێ مەترسیێ. نھا ژی ل گەل دا بیت سەدان گووند ژ بەر ھەبوونا چەکدارێن پەکەکێ نەھاتنە ئاڤەدان کرن و بوونە قادێن شەر و پەڤچوونان.
ل ڤر دا داخواز ژ ھەمو ئالیەکێ دکەم بۆ کو رەوشا وەلاتێ مە ژ ڤێ زێدەتر تێک نەچیت و جھێن وێرانکری بێنە ئاڤادان کرن و رێ ل ئالۆزیا زێدەتر و روودانێن نەخواستی بهێتە گرتن، پێویستە رێ ب خوەسەپاندنا نەیاسایی یا هیچ ئالیەکێ نەدەن و پشتەڤانیێ ل خەبات و قوربانیا پێشمەرگە و گەلێ سیتەملێکریێ مە بکەن و ل ئاستا بەرپرسیاریا ڤێ قۆناخێ دا بن.
مەسعوود بارزانی
2/11/2020
