ھەژمارا مریێن ئەردھەژا ئیزمیرێ زێدە بوو

ھەژمارا مریێن ئەردھەژا ئیزمیرێ زێدە بوو

ل ناڤچەیا سەفەریھیسارا سەر ب پارێزگەھا ئیزمیرێ یا ترکیێ رۆژا ئەینی ئەردھەژەک قەومیبوو و ھەژمارا مریێن د ئەنجاما وێ ئەردھەژێ دا دەرکەت ٩١ کەسان.

رۆژا ئینێ ٣٠ێ جۆتمەھا ٢٠٢٠ێ ل ناڤچەیا سەفەریھیسارا سەر ب پارێزگەھا ئیزمیرێ، ب ھێزا ٦.٦ ئەردھەژ قەومیبوو.

سەرۆکاتیا رێڤەبەریا کارەسات و رەشوا بلەز (ئافاد)یا سەر ب وەزارەتا ناڤخوە یا ترکیێ راگەھاند کو ھەژمارا مریێن د ئەنجاما ئەردھەژێ دا، بوویە ٩١ کەس.

وەزیرێ ژینگەھ و باژێرڤانیێ مورات کوروم ژی ئاشکەرا کر: “٩٦٢ وەلاتیێن مە ب رەنگەکێ بریندار ھاتنە رزگارکرن. وەلاتیێن مەیێن کو دەرمانکرنا وان بەردەوامە، ٤ ژ وان رەوشا وان گرانە و ب گشتی ٩ بریندار ل بن چاڤدێریا ھوور دا نە.”

ژ لایێ دی، وەزیرێ پەروەردەیا نەتەوی یا ترکیێ زیا سەلچوک راگەھاند کو ل سەرانسەرێ باژێر حەتا حەفتەیەکێ پەروەردە ھاتە راوەستاندن و ئاشکەرا کر کو ل گۆر رەوشێ ئەڤ دەمە دبیت کو بهێتە درێژکرن.