د سیسته‌ما جیهانێ دا هێزێن کو وەک تەرۆریست دهێنه نیاسین ژ بال نەتەوەیێن یه‌كگرتی و گەلێن جیهانێ گه‌له‌كن، لێ بەلێ چ یەک ژ وان رێكخستن، کەس و ئالییان ئه‌وێن ب تەرۆریست دهێنه نیاسین، خۆ ب تەرۆریست نا هه‌ژمێرن و نه‌ڤێن چ کارەکی ل سەر خۆ بکه‌نه مال و رەواتیێ ب ڤێ ناڤکرنا خۆ بده‌ن.
د ناڤا رێكخستنێن کوردستانێ و جیهانێ دا تەنێ «پارتییا کارکەرێن کوردستانێ» کو ب دەنگەک بلند مینا دەنگێ چەکێن خۆ یێن کو ل سینگا پێشمەرگە و گەلێ کوردستانێ دگرن، گه‌له‌ك ب دەنگ و حەزەک زێدە دبێژن ئەم تەرۆریستین، بەلێ هه‌وه بڤێت یان نه‌ڤێت، هه‌وه پێ باش بیت یان خەراب ئەم تەرۆریستین، کریارێن مە شاهدەیێ ل سەر ناڤێ مە دده‌ت.
پەکەکە د نها دا ب کارێن خۆ یێن قرێژ ل دژی گەل و حکوومەتا تاکە پارچەیا ئازاد یا کوردستانێ ب روهنی دبێژیته گەلێن جیهانێ بگشتی و کوردستانێ ب تایبه‌تی ئەو تەرۆریستە، ژ بەر کو ل گۆر هەموو قانوونێن ناڤنەتەوی، تەقاندنا ئۆتۆمبێلان، شەهید كرنا فەرمانبەرێن حکوومەتێ، رەڤاندنا زارۆکان ب کارێن تەرۆریستی دهێن هه‌ژمارتن.
پەکەکێ ب کوشتنا جێگرێ سەركۆنسۆلێ ترکیێ ل خوارنگەها هۆککەبازێ ل هه‌ولێرێ و شەهید كرنا غازی سالح ئالیخان، بەرپرسێ ئاساییشا دەریێ سینۆری یێ سەر زێری ل 8ی مەها رابووری، ته‌قاندنا هێلا ڤه‌گوهاستنا په‌ترۆلا كوردستانێ، تەقەکرن ل هێزێن پێشمەرگە یێن ل دینارتێ، رەڤاندنا چەندین جوانێن کورد ل ناڤچەیێن سنۆری یێن هەرێما کوردستانێ ب به‌هانه‌یێن بێ ئەساس و داخوازکرنا پەرەیان ژ مالباتێن وان ژ بۆ به‌ردانا وان گه‌نجان و ئیرۆ ژی ب شەهید ئێخستنا پێشمەرگەیەکی و بریندار کرنا دوو پێشمەرگەیێن دی، ب هەموو جیهانێ را راگهاند کو ئەو نە ته‌ڤگه‌ره‌كا رزگاریخوازن، بەلکو ئەو رێكخستنه‌كا تەرۆریستی نە.
پەکەکە رێخستنەکە کو خۆ رەحمێ ب ئالیگرێن خۆ ژی نابه‌ت، ب ئاوایەکێ سیستەماتیک ئالیگرێن خۆ دکوژیت و پشترە وان ب شەهید ددەته ناساندن داکو مالباتێن وان ب خۆڤە گرێ بدەت بازاری ب خوینا وان دكه‌ت، پەکەکە جاران دبێژیت ئەڤ كه‌سه ژ بال ترکیێ هاتینە شەهید کرن، و جار ژی کوشتنا وان ددەته پال ئالیێن سیاسی یێن کوردستانێ، وەک کوشتنا مەدیاکار “وەداد حسێن” د ناڤا بازارێ دهوکێ دا، پەکەکێ د رۆژا زەلال دا و د ناڤا دهۆکێ دل وەداد شەهید كر، لێ ژ بەر کو وان چامیدیایه‌كا بهێز هه‌یه، وەها دا نیشاندان کو “وەداد” ژ بال دەزگەهێن ئەولەهییا باشوورێ کوردستانێ، هاتییە شەهید خستن.
دبیت ئەو کارێن پەکەکە دکەت ب تەنێ ژ بۆ وێ یەکێ بن کو دوو ئاخافتنێن “مەسعوود بارزانی” پێچەوانە ده‌ه‌ربێخیت، دەما ل هەموو سازیێن راگەهاندنێ یێن کوردستانێ و جیهانێ دا رازی نەبووی پەکەکێ ب تەرۆریست بناسینیت، بارزانی چەندین جاران و د چەندین هەڤپەیڤینێن خۆ دا دگەل سازیێن مەدیایی یێن جیهانی راگهاند کو پەکەکە نە تەرۆریستە، هەروەها ژ بۆ پێچەوانەکرنا ئاخافتنا دی یا بارزانی کو شەرێ براکوژی حەرام کرییە، دبیت پەکەکە ڤان کاران ئەنجام بده‌ت، ژ بەر کو سیاسەت، ئایدۆلۆژی، ئەخلاق و میتۆدا پەکەکە ل سەر برێڤە دچیت ئەڤەیه کو وەکە یەک ژ رایەدارێن پەکەکێ یێ ب ناڤێ “رێزان جاڤید” دبێژیت، “هەر تشتێ کو بارزانی و مالباتا وی گۆت، هوون بەرەڤاژی بکه‌ن ئەو کوردایەتی و ئەو راستییە”، بەلێ ب راستی ژی ئەخلاق و سیاسەتا پەکەکێ ئەڤەیه.
پەکەکێ ب کار و کریارێن خۆ ب هەموو جیهانێ را ئەشکەرە کر کو ئه‌و تەرۆریستن و ئەو ناخوازن ناڤێ وان د لیستەیا تەرۆرا جیهانی دا بهێته دەرێخستن، پەکەکێ ب هەموو جیهانێ راگهاند کو ئەو ژی وه‌ك رێكخستنێن تالیبان، قاعیدە و داعشێ رێكخستنەکە تەرۆریستی یە و چ جوداهی د ناڤبەرا وان دا نینە، ب تەنێ ئەڤ نه‌بیت کو ژ ئالیێ ئایدۆلۆژی جوداهی د ناڤبەرا وان دا هەیە.
پەکەکە ب کارێن ب ڤی ئاوایی نە ب تەنێ رەواتیێ ددەته ئێریشێن ترکیێ، بەلکو پشتەڤانیێ ل ئاخافتنێن رایەدارێن ترکیێ ب گشتی و ئاردۆغان ب تایبەتی دکەت دەما کو ژ جیهانێ را دبێژیت “ئەم دگه‌ل رێكخستنەکا تەرۆریستی دا د شه‌ری دای نە” ب ڤێ یەکێ نە ب تەنێ ئێریشا ترکیێ ل سەر رۆژئاڤا رەوا دکەت بەلکو ئێرشا ل سەر باشوور ژی کو دەمەکە هاتییە راگرتن ب ئێریشەکە رەوا و مافێ ترکیێ ددەته نیشاندان.
