جیگرێ وەزیرێ پێشمەرگە یێ حكوومه‌تا باشوورێ کوردستانێ، هێرشا په‌كه‌كێ ل سەر هێزێن پێشمەرگە شەرمەزار کر و دا زانین ئەڤ هێرش ل دژی ھەموو دەستکەفتیێن ھەرێما کوردستانێ یە.
سەربەست لەزگین، دەربارێ هێرشا په‌كه‌كێ یا ل سەر پێشمەرگەیێن کوردستانێ داخویانیەک بەلاڤ کر و راگه‌ھاند هێرشا په‌كه‌كێ ل سەر هێزێن پێشمەرگە، ئیسبات دکەت کو په‌كه‌كه ژ بۆ تێکدانا ئاساییشا ھەرێما کوردستانێ کار دکەت.
لەزگین ئاماژە کر، ب هێرشێن خۆ بۆ سەر پێشمەرگەیێن باشوورێ وه‌لات، راستییا په‌كه‌كێ دەرکەتییە کو ئەو کار ژ بۆ تێکدانا ئاساییش و ئەولەھییا باشوورێ کوردستانێ دکەت.
ھەروھا تەکەز کر کو هێرشا په‌كه‌كێ، نە ل دژی پارتییا دەمۆکراتا کوردستانێ یە، ل دژی ھەموو دەستکەفت و خەبات و قوربانیدانا خەلکێ باشوورێ کوردستانێ یە.
جیگرێ وەزیرێ پێشمەرگە دەستنیشان کر، كارڤه‌ندانێن به‌رفره‌هـ ل په‌ی هێرشێن په‌كه‌كێ هاتن، ل سەر ڤێ مژارێ وەزارەتا دەرڤە یا ئامەریکایێ و سەرۆکاتییا ھەرێما کوردستانێ و سەرۆکاتییا ئەنجوومەنا وەزیران و پارلەمەنتۆیا کوردستانێ و پارلەمەنتۆیا ئیراقێ، هێرشا په‌كه‌كێ یا ل چەمانکێ، شەرمەزار کرن.
د چەند رۆژێن دەرباسبوویی دا چەکدارێن پارتییا کارکەرێن کوردستانێ، ل سنۆرێ ناحیا چەمانکێ یا سەر ب ناڤچەیا ئامێدیێ، سێ هێرشێن جودا برن سەر ھێزێن پێشمەرگەیێ کوردستانێ و پۆلیسێن پاراستنا پەترۆل و گازێ، د ئەنجاما وان هێرشان دا پێشمەرگەیەک شەھید بوو و ھەژمارەک پێشمەرگە و پۆلیس بریندار بوون.
ھەروھا چەند رۆژ بەرێ ژی چەکدارێن په‌كه‌كێ بۆرییا پەترۆلێ یا ھەرێما کوردستانێ یا ل سنۆرێ ترکیێ تەقاندبوون و زیانه‌كا مه‌زن ب ئابووری كوردستانێ كه‌ت.
