فەرەنسا ئەو ئێریشا چەند رۆژ پێش چەکدارێن پەکەکێ ل پارێزگەها دوهۆکێ ل دژی هێزێن پێشمەرگەیێن کوردستانێ ئەنجام دای پرۆتەستۆ دکەت.
د داخویانیەکا وەزارەتا کارێن دەرڤە یا فەرەنسایێ دا هاتیە “فەرەنسا هەڤخەمیا خوە ژ بۆ مالباتێن قوربانیان دیار دکەت و هێڤی دکەت رەوشا ساخلەمیا بریندار ب زووترین دەم باش ببیت.”
د بەشەکێ دی یێ داخویانیا وەزارەتا کارێن دەرڤە یا فەرەنسایێ دا ئێماژە ب ڤێ چەندێ هاتییە کرن کو “هێزێن هەرێما کوردستانێ د گەل هێزێن ئیراقا فەدەرال هەڤبەشێن مە نە د شەرێ دژی داعشێ دا.”
فەرەنسا دژاتیا خوە ژ بۆ وان کارێن پارتیا کارکەرێن کوردستانێ نیشان دا و راگەهاند ئەڤ کارە ل دژی سەروەری و یەکپارچەییا ئاخا ئیراقێ و ئەولەهیا هەرێما کوردستانێ نە.
هەر وها فرانسا دبێژیت کو پارتیا کارکەرێن کوردستانی (پەکەکە) گرووپەک “تەرۆریستی” یە د یەکیتییا ئەورۆپایێ دا.
ئەڤە د دەمەکێ دا یە کو رۆژا ئەینی 6/11/2020ێ، وەزارەتا کارێن دەرڤە یا ئەمریکایێ د داخویانیەکێ دا ئێریشا چەکدارێن پەکەکێ ل سەر هێزێن پێشمەرگەیێن کوردستانی ل چەمانکێ پرۆتەستۆ کر و راگەهاند ئەو دێ پشتەڤانیا حکوومەتا ئیراقێ و هەرێما کوردستانێ کەن ژ بۆ ژناڤبرنا “تەرۆرێ”.
