وەزیرێ دەرڤەیێ ئەمریکا مایک پۆمپێۆ ب رێیا تویتەکێ بەرسڤا گۆتنێن عەلی خامەنەیی رێبەرێ کۆمارا ئیسلامییا ئیرانێ یێن ل سەر ھلبژارتنانێن ئەمریکایێ دا، پۆمپێۆ گۆت “ھلبژارتنێن وە حەنەکن”.
عەلی خامەنەیی ل سەر تویتەرا خوە ب زمانێ ئنگلزی نڤیساند “رەوشا ویلایەتێن یەکبوویی یێن ئەمریکایێ و تشتێ ئەو بخوە ل سەر ھلبژارتنان دبێژن دیمەنەکە! ئەڤ ژی میناکەکە روویێ کرێتیێ دیمۆکراتییا لیبەرالی یا ئەمریکا نیشان ددەت. دوور ژ ئەنجامان، تشتەکی تام زەلال ھەیە، ئەو ژی داکەتنا سیاسی، مەدەنی و ئەخلاقی یا زەلالیا دەستھلاتا ئەمریکایە.”
پۆمپێۆ د بەرسڤدانا خوە یا ل ھەمبەر عەلی خامەنەیی دا د تویتەکێ دا وەھا نڤیساند “تە بخوە سەد میلیۆنان پارە ژ گەلێ خوە دزینە، ھلبژارتنێن تە ژی حەنەک و پێکەنۆکن، ھوون رێ لبەر سەدان بەربژێران دگرن ناھێلن حەتا خوە کاندید بکن. ئیرۆ گەلێ تە ژ برسیبوونێ دنالیت، ژبەر کو تو ملیاران ل جەنگێن ب وەکالەت دمەزێخی دا کو دەستھلاتا وە یا کلەپتۆکراسی بپارێزن.”
مالپەرا رادیۆ یا فەردا یا ئامەریکی کو وەشانا خوە ژ باژێرێ پراگ ب زمانێ فارسی دکەت و بەشەکە ژ رادیۆیا یا ئەورووپا ئازاد، ددەتە زانین کو عەلی خامەنەیی د تویتا خوە دا ئەنجامێن ھلبژارتنێن ئەمریکا یێن 2020ێ وەکو تێکچوونا سیاسی، مەدەنی و ئەخلاقی دبینیت.
