داودئۆغلۆ: پێویستە سیستەمێ دەولەتا ترکیێ بهێتە گوهەرین

داودئۆغلۆ: پێویستە سیستەمێ دەولەتا ترکیێ بهێتە گوهەرین

 سەرۆکێ پارتیا پاشەرۆژێ ئەحمەد داودئۆغلۆ دبێژیت، “کۆمارا ترکیێ نە دەولەتەکا عەشیری یە” و داخواز دکەت ئەڤ سیستەمە بهێتە گوهەرین.

 سەرۆکێ پارتیا پاشەرۆژێ ئەحمەد داودئۆغلۆ ئیرۆ رۆژا دوشەمبێ ل ئەنقەرێ دەربارێ دەست ژ کاربەردانا وەزیرێ گەنجینە و دارایی بەرات ئالبایراک کۆنگرەیەکا رۆژنامەڤانی ساز کر.

ئەحمەد داودئۆغلۆ دبێژیت، دەست ژ کار بەردان میکانیزمەک شەرەفمەندانەیە، لێ ب یەک ئالی دهێتە وەرگرتن، مخاتابێن وێ دەستپێکێ بەرپرسێن بلند و پاشێ ژی رایا گشتییە.

ئەحمەد داودئۆغلۆ دیار دکەت، “دەولەتا کۆمارا ترکیێ، نە دەولەتەکا عەشیری یە. راگەھاندنا دەستژکاربەردانێ ل سەر تۆرێن جڤاکی کاریگەریێ ل سەر پێکھاتەیا دەولەتێ دکەت.”

سەرۆکێ پارتیا پاشەرۆژێ دبێژیت، “دەست ژ کار بەردانەک ھەیە و نڤیسینەک ھاتیە بەلاڤکرن، لێ ئەو نڤیس نە دهێتە پشتراستکرن و نە ژی دهێتە رەدکرن. زێدەتر ژ 12 دەمژمێر ل سەر دەرباس بوونە، دەست ژ کار بەردانەکا ب ڤی رەنگی ھەیە؟ نینە. د وەلاتێن دیمۆکراسی دا تشتەکێ ب ڤی رەنگی نابیت هەبیت.”

وەزیرێ گەنجینە و دارایی بەرات ئالبایراک کو زاڤایێ سەرۆک کۆمارێ ترکیێ رەجەپ تەییب ئەردۆگانە، دوھی ل سەر حەسابا خوە یا ئنستاگرامێ نامەیا دەست ژ کار بەردانا خوە بەلاڤ کر و تێدا راگەھاند، ژ بەر سەدەمێن پەیوەست ب تەندروستیا خوە، ئەو دەست ژ ئەرکێ وەزارەتێ بەر ددەت.

پشتی دەست ژ کار بەردانا ئالبایراک، گەلەک کارڤەدان ل ناڤخوەیێ ترکیێ چێ بوونە. پارتیێن ئۆپۆزسیۆنێ داخوازا زەلالکرنێ دکەن و بەرپرسێن ئاک پارتیێ ژی داخواز دکەن، داخوازا وی یا ئیستیفایێ نەهێتە قەبوولکرن.

ھەتا نھا سەرۆک کۆماریا ترکیێ، بەرسڤا داخوازا دەست ژ کار بەردانا ئالبایراک نەدایە.