داوی داخویانییا وه‌لید موعه‌لم ل ده‌ربارا سه‌رۆكێن عه‌ره‌بان و هه‌سه‌دێ

داوی داخویانییا وه‌لید موعه‌لم ل ده‌ربارا سه‌رۆكێن عه‌ره‌بان و هه‌سه‌دێ

وەزیرێ دەرڤە و کۆچبەران و جیگرێ سەرۆکوەزیرێ سووریێ وەلید موەلم کۆچا داویێ کر، ڤی سیاسه‌تمه‌دارێ مه‌زنێ سووریێ داوی جار سه‌رۆكێن عه‌ره‌بان ب دارده‌ست ب ناڤ كربوون.

تەلەڤزیۆنا فەرمییا سووریێ بەلاڤ کر، وەزیرێ دەرڤە و کۆچبەران و جیگرێ سەرۆکوەزیرێ سووریێ وەلید موعه‌لم ئیرۆ دانێ سبێ، د تەمەنێ 79 سالیێ دە کۆچا داویێ کر.

دیار کر ژی، وەلید موەلم سالا 1941ان ل شامێ ژ دایک بووبوو و د سالا 1963ان دە ل زانینگەھا قاھیرەیێ لیسانسا ئابۆری ب دەست خستیە.

موعه‌لم د سالێن 1990-1999ان دە وەک بالیۆزێ سووریێ ل ئامەریکایێ بوو، پشترە د دەستپێکا سالا 2000ان دە بوو ئالیکارێ وەزیرێ دەرڤە،د سالا 2005ان دە وەک جیگرێ وەزیرێ دەرڤە دەست ب کار کر و ژ سالا 2006ان ڤە وەک جیگرێ سەرۆکوەزیر و وەزیرێ دەرڤە و کۆچبەران بوو.

وه‌لید موعه‌لم كو پشتگره‌كی سه‌رسه‌خت یێ ره‌ژیما سووریێ دهات ناس كرن، هه‌لوه‌ستێ وی ل ده‌ربارا رۆژئاڤا كوردستانێ و رێڤه‌به‌رییا خوه‌سه‌ر د هه‌موو قادێن دنیایێ ده‌ پڕ زه‌لال بوو، وه‌كه‌ وه‌زیرێ ده‌رڤه‌ یێ سووریێ وی تو جاره‌كێ دان ب ناڤچه‌یێن كوردی نه‌كربوو، هێزێن سووریایا ده‌مۆكراتیك ژی ب كۆمه‌كه‌ ده‌ریاسایێ و جوداخواز ناڤ دكر.

وه‌زیرێ كۆچ كر د داوی جڤینا كۆمه‌له‌یا گشتی یا نه‌ته‌وه‌یێن یه‌كبوویی ده‌ به‌ریا دوو مه‌هان، كارێن هه‌سه‌دێ ل ناڤچه‌یێن كوردی و دێرازوورێ شه‌رمه‌راز كر و ئه‌و هێز ب میلیشیا ناڤ كربوو، ئه‌ڤ یێك بووبوو سه‌ده‌م كو رێڤه‌به‌رییا خوه‌سه‌ر د به‌یانه‌كێ ده‌ به‌رسڤا موعه‌لم ب دژواری بده‌.

موعه‌لم د داوی داخویانییا خوه‌ ده‌ ل ده‌ربارا وه‌لاتێن عه‌ره‌بی و سه‌رۆكێن وان گۆتبوو كو سووریه‌ ل په‌یوه‌ندیێن رابووری نانێره‌، تشتا ژ بۆی وان گرینگ قووناغا نوویه‌، لێ به‌لێ پرس ل ڤر ئه‌ڤه‌، ئایا سه‌رۆكێن عه‌ره‌بان بریارا وان د ده‌ستێ وان ده‌یه‌؟