په‌كه‌كێ به‌رپرسێ خوه‌ یێ گۆمركا شه‌نگالێ ته‌سفییه‌ كر

به‌رپرسێ گۆمركا شنگالێ یا پارتییا كاركه‌رێن كوردستانێ «عرفان ئاكجان» كه‌ته‌ به‌ر ئێریشه‌كێ و هاته‌ كوشتن، ناڤبووری كارێ ڤه‌گوهاستنا چه‌كداران دكر و باج ژ وه‌لاتییان دستاند، لێ به‌لێ نه‌زلاله‌ ئه‌و ب ده‌ستێ ده‌وله‌تا تركیێ هاتییه‌ كوشتن یان په‌كه‌كێ ته‌سفییه‌ك كرییه‌.

ل گۆر ئاگاهیێن ده‌ستێ مه‌، «عرفان ئاكجان» ب كۆد ناڤێ «ئازاد هه‌شه‌ت»، به‌رپرسێ گۆمركێن په‌كه‌كێ بوو ل شنگالێ، ناڤبووری د لیستا گه‌ور یا داخواز كریێن ده‌وله‌تا تركیێ دا بوو، د ناڤبەرا سووریێ و شنگالێ دا کارێن دەرباسبوونا چه‌كداران و دەرباسکرنا جەبلخانەیێ دكر و ل سەر سنۆری ژی باج ژ وه‌لاتییان د ستاند.

«ئازاد هه‌شه‌ت» ل 8 ڤێ مه‌هێ ل سه‌ر سنۆرێ شنگالێ و سووریێ هاتییه‌ كوشتن و هێژان نه‌زلاله‌ كیژان ئالی ئه‌و كوشتییه‌، لێ به‌لێ ئاگاهیێن كو ژ شه‌نگالێ ب ده‌ست چاڤكانیێن پێگه‌ها داركا مازی كه‌تنه‌ ئه‌شكه‌ره‌ دكن كو ئازاد هه‌شه‌ت ژ بال په‌كه‌كێ ب خوه‌ ڤه‌ هاتییه‌ ته‌سفییه‌ كرن.

«عرفان ئاکجان» ل سالا 2010ان دا ته‌ڤلی په‌كه‌كێ بوویه‌،  ل سالا 2015ان دا ل سلۆپیێ د بوویەرێن شه‌رێ خه‌نده‌كان دا‌ چالاک بوویە.

«ئاکجان» د سالا 2019ان دا بوویه‌ بەرپرسیارێ گۆمركێن شنگالێ یێ په‌كه‌كێ، د ناڤبەرا سووریێ و شنگالێ دا کارێ دەرباسبوونا چه‌كداران و دەرباسکرنا جەبلخانەیێ دمەشاند و ل سەر سنۆری ژی ژ بۆ په‌كه‌كێ خەراج دستاند، «ئاکجان» د ناڤ رێخستنێ دا ب کۆد ناڤێن «رۆژگەر ئازاد، ئازاد مونزور و ئازاد ھەشەت» دهات ناس كرن.

هێژای گۆتنێ یه‌، پارتییا كاركه‌رێن كوردستانێ هێژان تو داخویانی ل ده‌ربارێ ڤی كادرۆیێ خوه‌ پارڤه‌نه‌كرنه‌، لێ به‌لێ تێ پێشبینی كرن پاش چه‌ند رۆژان ب داخویانییه‌كێ وی وه‌كه‌ شه‌هید ئیلان بكه‌ت و ببێژیت كو وی د ئه‌ركا سه‌ربه‌ست كرنا شه‌نگالێ دا جان فه‌دا كر.

پارتییا كاركه‌رێن كوردستانێ ژ ده‌ستپێكا دامه‌زراندنێ ب هه‌ژماره‌كه‌ هه‌ری زۆر یا كادرۆیێن خوه‌ ته‌سفییه‌ك كرنه‌، پشتره‌ وان وه‌كه‌ شه‌هید ئیلان دكه‌.