ل گۆری مەدیایا ئیسرایلێ سەرۆکوەزیرێ ئیسرایلێ بنیامین نەتانیاھو دۆھی رۆژا یەکشەمبی 22یێ مژدارێ ب سەرەدانەک نهێنی چوویە عەرەبستانا سعوودی.
ل گۆری ئاگاھیان، نەتانیاھو ل سعوودیێ دگەل وەلیعەهدێ سعوودیێ محەمەد بن سەلمان و وەزیرێ دەرڤەیێ ئەمریکا مایک پۆمپەئۆ جڤییایە.
دهێتە گۆتن کو سەرۆکێ مۆئسادێ یۆسس کۆھەن بەشداری جڤینێ بوویە، لێ وەزیرێ پاراستنێ بەننی گانتێز و وەزیرێ دەرڤەیێ ئیسرائیلێ گاب ئاشکەناز ئامادە نەبوون.
مەدیایا ئیسرایلێ هەر وەها راگەھاند، کو بالەفرا نەتانیاھو د 22یێ چرییا پاشیێ دا د دەمژمێر 7:30 ئێڤاری دا چوویە باژێرێ نەۆم یێ عەرەبستانا سعوودی و پشتی نیڤا شەڤێ جارەکا دی ڤەگەریایە ئیسرایلێ.
حەتا نھا، هیچ کاربدەستەکی ئەڤ نووچە پشتراست نەکریە، لێ تۆپا لوک، یەک ژ شێورمەندێن نەتانیاھو، ب تویتەکێ ئاشکەرا کر کو سەردان پێک ھاتیە. رادیۆیا ئارتێشا ئیسرایلێ ژی جڤین راگەھاندیە.
ل سەر مژارێ نڤیسینگەھا نەتانیاھو نەخواست هیچ داخویانیەکێ بدەت.
سەفەرا نەتانیاھو یا ژ بۆ باژێرێ نەۆم، ل پەراڤا دەریایا سۆر ژ لایێ مالپەرێن شۆپاندنا فرینێ ڤە ھاتە شۆپاندن.
پشتی پەیمانێن ئیسرایلێ یێن د گەل ئیمارات، بەحرەین و سوودانێ دھاتە باسکرن کو دێ ئیسرائیل دگەل عەرەبستانا سعوودی ژی پەیمانا ئاساییکرنا تێکەلییان ئیمزا کەت، لێ بەلێ حەتا نھا ب ئاوایەکێ ئاشکەرا نەھاتیە راگەھاندن.