نڤیسینگەھا پاراستنا زارۆکان راگەھاند کو پشتی سکالایێن وەلاتیانێن دەربارێ بچەککرنا زارۆکێن وان، حەتا نھا 10 زارۆک ژ بۆ مالێن وان ھاتینە ڤەگەراندن.
ھەڤسەرۆکێن نڤیسگەھا پاراستنا زارۆکان ل قامشلۆ میدیا نەسرەدین و حوسێن عەلی ئیرۆ رۆژا دوشەمبێ ل باژێرێ قامشلۆ ل سەر مژارێ جڤینەکا رۆژنامەڤانی ل دار خست.
ھەڤسەرۆکا نڤیسینگەھا پاراستنا زارۆکان ل قامشلۆ میدیا نەسرەدین راگەھاند، ژ دەما ڤەکرنا نڤیسینگەھا وان حەتا نھا نێزیکی 50 گلینامە ژ لایێ وەلاتیان ڤە ل سەر بچەککرنا زارۆکان گەھشتینە نڤیسینگەھا وان کو 16 سکالانامە ژ وەلاتیێن باژارێ قامشلۆ نە.
میدیا نەسرەدین دیار کر، ژ وێ ھەژمارا سکالایان، حەتا نھا 10 زارۆک کو ھاتبوون بچەککرن، ژ بۆ مالێن وان ھاتنە ڤەگەراندن، ژ وان ژی 4 زارۆک ل قامشلۆ نە.
١٩ تیرمەھا 2019ێ، ھێزێن سووریایا دیمۆکراتیک (هەسەدێ) دگەل نەتەوێن یەکبوویی پرۆتۆکۆلا ب دوماهی ئانینا تەڤلیکرنا زارۆکێن د بن تەمەنێ 18 سالیێ دا بۆ لەشکەریێ ئیمزا کربوو.
ل گۆر یاسایێن ناڤدەولەتی چەکدار کرنا زارۆکان ب تاوان دهێتە زانین، لێ بەلێ پەکەکە و رێخستنێن سەر ب وێ ڤە ب چ رەنگا پێگیریێ ب وێ یاسایێ ناکەن و بەردەوام زارۆکان ژ مالباتێن وان درەڤینن و وان چەکدار دکەن، ڤێ چەندێ ژی بەردەوام کارڤەدانێن ناڤخوە و ناڤدەولەتی ل دووڤ خوە ئانینە.
