ئەمەریکایێ بلندكرنا وێنەیێن ئۆجالان و ئالایێن پەکەکێ ل رۆژئاڤا قەدەغە کر
ئەمەریکایێ ژبەر وێنەیێن ئۆجالان و ئالایێن پەکەکێ فشارا ل سەر ھێزێن سووریایا دەمۆکراتیک زێدە کر و ژێ خوەستییه، ئێدی ئەڤ وێنە ل رۆژئاڤا کوردستانێ نەھێن ھلدان.
ل گۆر پێگەھا «ئەلعەربی 21»، ئەمەریکایێ زەختا ل سەر ھێزێن سووریایا دەمۆکراتیک ھەسەدێ و ھەروه‌ھا رێڤەبەرییا خوەسەر ب سەدەما پارتییا کارکەرێن کوردستانێ زێدە کرییە و ژێ خوەستییە ئێدی وێنەیێن عەبدوللا ئۆجالان و ئالایێن پەکەکێ، ل رۆژئاڤا کوردستانێ نەھێن ھلدان.
دەست نیشان کر، ئامانج ژ ڤێ ھەنگاڤا ئەمەریکایێ، چێكرنا نێزبوونەکێ یه ل نێڤبەرا ھەسەدێ و ترکیێ و ھەم دەم ل نێڤبەرا ھەسەدێ و ئۆپۆزسیۆنا سووریێ.
چاڤکانیێن خوەجھی ئەشکەرە کرنە، ھەسەدە ل سەر ڤێ داخوازا ئەمەریکایێ رازیبوویە و تەعلیمات شاندنە کو ئێدی ئالایێن پەکەکێ ل باکور و رۆژھلاتا سووریێ نەھێن ھلدان.
د ڤێ دەربارێ دە، چالاکڤانێ سیاسی یێ کورد، مەحموود نۆح تەکەز دكه‌ت، ئەمەریکایێ ب ئاوایەکی بەردەوام زەختێ ل ھەسەدێ دکه‌ت کو ئێدی ئالایێن پەکەکێ ل ناڤچەیێن ژێر دەستھلاتا وێ نەھێن ھلدان.
ڤی چالاکڤانی ژ بۆ پێگەھا ئەلعەربی گۆتییە: رایەدارێن ئەمەریکایێ ھشداری دانە ھەسەدێ کو بلندکرنا ئالایێ پەکەکێ دێ ئێنجامێن ھەری خەراب ل پەی بن و ئیدارەیا ئەمەریکایێ ب زه‌لالی ژێره گۆتییه کو ئەڤ یێک دێ بیته سەدەما ژ دەست دایینا ناڤچەیێن رێڤەبەرییا خوەسەر.
ل دەربارا وێ یەکێ کانێ ھەسەدە تا چ ئاستێ پابەندی ڤێ داخوازا ئەمەریکایێ بوویە، مەحموود نۆح دبێژە: ھەسەدە نھا دوو بالن، یەک ژێ تەعلیماتا ژ قەندیلێ وەردگریت و بالەکی دن ھەیە کو مەزلووم عەبدی سەرپەرشتیێ لێ دکەت و بزاڤێ دکەت مەسەلەیا کوردی ژ قەندیلێ جودا بکەت.
ل گۆر نه‌رینا مه‌حموود نۆح، نه هێسانه هه‌سه‌ده تام پابه‌ندی ڤێ داخوازا ئه‌مه‌ریكایێ ببیت، ژ به‌ر كو بالێ قه‌ندیلێ د ناڤا هه‌سه‌دێ دا بهێزه.
