شێورمەندا ئەلمانیایێ ئانگێلا مێرکل راگەھاند کو هیچ پێشڤەچوونەک د پەیوەندیێن یەکیتیا ئەورۆپایێ و ترکیێ دا نینە و د لووتکەیا یەکیتیا ئەورۆپایێ دا، سزدانا ترکیێ د رۆژەڤێ دایە.
ئانگێلا مێرکلێ دەستنیشان کر کو ژ جڤینا جۆتمەھێ حەتا نها، د ناڤبەرا یەکیتیا ئەورۆپا و ترکیێ دا ئاستەنگی و زەحمەتیێن مەزن ھەنە و “مخابن د پەیوەندیێن ل گەل ترکیێ دا پێشڤەچوون چێنەبوویە”.
مێرکل دا زانین کو د لووتکەیا یەکیتیا ئەورۆپا یا مەھا کانوونێ دا، مژارا ترکیێ د رۆژەڤێ دایە و ئەو نزانن گۆتووبێژ دێ چاوا هێنە ئەنجامدان.
ھەروھا ل سەر ڤەگەرا کەشتیا ئۆروچ رەسا ترکیێ، کو ل رۆژھەلاتێ دەریایا سپی ل چاڤکانیێن ئەنەرژیێ دگەریا، مێرکلێ ئاشکەرا کر: “ڤەگەرا کەشتیا ئۆروچ رەس بۆ بەندەرا ترکیێ، بەریا لووتکەیێ نیشانەیەکا باشە.”
ئانگێلا مێرکل دەستنیشان کر کو ئەڤ مژارە د لووتکەیا 10-11ێ کانوونێ دا دێ هێتە نیقاش کرن.
