وه‌زاره‌تا به‌رگرییا تركیێ راگهاند، ئه‌و ل گه‌ل ئالیێ رووسیا گهشتنه په‌یمانه‌كێ ژ بۆ ئاڤاكرنا ناڤه‌نده‌كا هه‌ڤپار ل كاراباغێ كو ل ده‌مه‌كێ نێزیك دێ ده‌ست ب كار ببیت.
ل گۆری داخویانییا وه‌زاره‌تا به‌رگریێ یا تركیێ كو ئیرۆ رۆژا سێشه‌می 1/12/2020ێ به‌لاڤ كرییه، وه‌زیرێن به‌رگریێ یێن تركیێ و رووسیا فه‌ده‌رال، خلۆسی ئاكار و سێرگی شویگو رێككه‌فتنا دانا ناڤه‌نده‌كا هه‌ڤپار ل هه‌رێما كاراباغێ ئیمزا كرییه.
ده‌ست نیشان كر، ده‌ست ب ئاماده‌كاریێن دانانا وێ ناڤه‌ندێ هاتنه كرن و ل ده‌مه‌كێ نێزیك دێ ده‌ست ب كار بیت.
ل 27 ئیلۆنا ئیسالێ ئارته‌شا ئازه‌ربایجانێ ئێریشی هه‌رێما كاراباغێ كر ب به‌هانه‌یا رزگاركرنا خاكا خوه ژ ده‌ستێ ئه‌رمه‌نان و ب وێ سه‌ده‌مێ شه‌ره‌كی دژوار ل نێڤبه‌را هه‌ردوو ئالییان ده چێبوو و نێزی 5 هه‌زار عه‌سكه‌ران ژ هه‌ردوو ئه‌نییان هاتن كوشتن.
ئارته‌شا ئازه‌ربایجانێ كو پشتگری ژ تركیێ وه‌ردگرت، ده‌ستێ خوه دانا سه‌ر 5 باژار و 286 گوندێن وێ هه‌رێمێ، پشتره و ل 10 مه‌ها ئۆكتۆبه‌رێ سه‌رۆكێ رووسیایێ فلادیمێر پۆتین ئاگربه‌ستا ل نێڤبه‌را ئازه‌ربایجان و ئه‌رمه‌نستانێ راگهاند.
