وه‌زاره‌تا به‌رگرییا ئه‌مه‌ریكایێ راگه‌هاند، یه‌كه‌یا ئه‌ركدار ژ بۆ به‌رهنگاربوونا رێخستنا ته‌رۆرێ یا داعشێ هات هلوه‌شاندن و برێڤه‌به‌رێ وێ ده‌ست ژ كار كێشایه، هات راگهاندن كو ئه‌ڤ مه‌زنه به‌رپرسێ پێنتاگۆنێ ژ بال ترامپی ڤه هاتییه ده‌رێخستن.
پێنتاگۆنێ د داخویانییه‌كێ دا ئیرۆ رۆژا سێشه‌می 1/12/2020ی ئه‌شكه‌ره كر، ئه‌و یه‌كه‌یا كو ژ بۆ به‌رهنگاربوونا رێخستنا ته‌رۆرێ یا داعشێ پێكهاتی و گرێدای ئۆفیسا وه‌زیرێ به‌رگریێ بوو، ئه‌ركێن وێ ب داوی هاتن و رێڤه‌به‌رێ وێ كریستۆڤه‌ر مایه‌ر ده‌ست ژ كار كێشا.
ده‌ست نیشا كر، ئیرۆ وه‌زیرێ به‌رگریێ ب وه‌كاله كریس میله‌ر ره‌زامه‌ندی ل سه‌ر ده‌ست ژ كار كێشانا برێڤه‌به‌رێ وێ یه‌كه‌یا ئه‌ركدار نیشان دایه.
وه‌زاره‌تا به‌رگرییا ئه‌مه‌ریكایێ ده‌ست نیشان كر، ب داوی ئینانا ئه‌ركێن ڤێ یه‌كه‌یێ ب واتایا سه‌ركه‌تنا ئۆپه‌راسیۆنێن ل دژی ته‌رۆرا داعشێ دهێت.
پێنتاگۆنێ هه‌م ده‌م ئه‌شكه‌ره كر، ئه‌ركێن رێڤه‌به‌رێ ڤێ یه‌كه‌یێ ئێدی دێ ژ بال ئۆفیسا ئالیكارێ وه‌زیرێ به‌رگریێ ڤه هێنه مه‌شاندن و ئه‌مه‌ریكا دێ ل گه‌ل ده‌وله‌تێن هه‌ڤپه‌یمان به‌رده‌وام پابه‌ند بیت ب به‌رهنگاربوونا رێخستنا ته‌رۆرێ یا داعشێ.
لێ به‌لێ مه‌دیایا ئه‌مه‌ریكایێ ئه‌شكه‌ره كرییه كو كریس مایه ب زه‌ختا ترامپی هاتییه ناچار كرن كو ده‌ست ژ كاری بكێشیت، د چارچووڤه‌یا وێ هه‌وا كو پاش شكه‌ستنا وی یا د هلبژارتنان دا ده‌ست پێ كری.
تێ زانین یه‌كه‌یا به‌رهنگاربوونا رێخستنا ته‌رۆرێ یا داعشێ ل سالا 2017ان هاتبوو دامه‌زراندن و كریس مایه‌ر وه‌كه برێڤه‌به‌رێ وێ هاتبوو ده‌ست نیشان كرن، ئه‌ركێن وێ برێڤه‌برنا دانوستاندنێن نێڤبه‌را وه‌لاتێن هه‌ڤپه‌یمان و ستراتیجیێن جه‌نگا لدژی ته‌رۆرێ بوون.
