فه‌رماندارییا ئۆپه‌راسیۆنێن هه‌ڤبه‌ش ئا ئیراقێ ئیرۆ ئه‌شكه‌ره كر، ته‌ڤاهییا كۆمێن چه‌كداران ژ شه‌نگالێ ده‌ركه‌تنه، لێ به‌لێ چاڤكانیێن خوه‌جهی دبێژن: چه‌كدارێن په‌كه‌كێ هێژان ل ناڤچه‌یێ نه.
ئیرۆ دوو رۆژ ل سه‌ر جی ب جی كرنا په‌یمانا شه‌نگال ئا ل نێڤبه‌را حكوومه‌تا ئیراقێ و حكوومه‌تا باشوورێ كوردستانێ ده‌رباس دبن، د رۆژێن ده‌رباسبوویی ده، چه‌كدارێن ب ناڤێ یه‌كینه‌یێن پاراستنا شه‌نگالێ یه‌به‌شێ یێن گرێدای په‌كه‌كێ باره‌گه‌هێن خوه ب جی هشتنه، هه‌مده‌م میلیشیا حه‌شدا شه‌عبی ژی باره‌گه‌هێن خوه ژ بۆ ئارته‌شا ئیراقێ و پۆلیسێن فه‌ده‌رال راده‌ست كرن.
د ڤێ ده‌ربارێ ده، ئیرۆ رۆژا پێنجشه‌می 3/12/2020ان، فه‌رماندارێتییا ئۆپه‌راسیۆنێن هه‌ڤبه‌ش ئا ئیراقێ ئه‌شكه‌ره كر، ته‌ڤاهییا كۆمێن چه‌كداران ژ شه‌نگالێ ده‌ركه‌تنه و پۆلیسێن فه‌ده‌رال ئه‌ركا پاراستنا شه‌نگالێ وه‌رگرتنه.
هه‌روه‌ها ده‌ست نیشان كر، حكوومه‌تا ئیراقێ ژ بۆ ده‌رخستنا چه‌كدارێن په‌كه‌كێ ژ شه‌نگالێ كه‌تییه ناڤا هه‌ولێن مه‌زن ده، ژ بۆ كو په‌یمانا نێڤبه‌را به‌غدا و هه‌ولێرێ ب ته‌مامه‌تی وه‌ره ب جی كرن.
لێ به‌لێ چاڤكانیێن خوه‌جهی ئه‌شكه‌ره كرنه، یه‌به‌شێ باره‌گه‌هێن خوه ب جی هشتنه، لێ به‌لێ چه‌كدارێن په‌كه‌كێ هێژان ل ناڤچه‌یا شه‌نگالێ و دۆربه‌را وێ ده مانه.
تێ زانین پاش ئێریشا ته‌رۆرا داعشێ یا ل ته‌باخا سالا 2014ان، په‌كه‌كه كه‌تییه د شه‌نگالێ ده و ناڤه‌ندا باژێر و ل گه‌ل 8 گوندێن شه‌نگالێ خستبوون ژێر كۆنترۆلا خوه.
