وه‌زیرێ كارێن ده‌رڤه یێ یه‌ونانستانێ راگەهاند، ئه‌ڤ كار و سیاسه‌تا تركیه نها د مه‌شینیت، قه‌ت بێ جه‌زا ده‌رباس نابن، ژ به‌ر كو تركیا ئۆپه‌راسیۆنێن له‌شكری ل ده‌رڤه‌ی وه‌لاتێ خوه دكەت و خاكا وه‌لاتێن ده‌ردۆر داگیر كرییه.
نیكۆس دیندیاس، وه‌زیرێ كارێن ده‌رڤه یێ یه‌ونانستانێ، ئیرۆ رۆژا یه‌كشه‌می 6/12/2020ێ ل ده‌ربارا دانوستاندنێن وه‌لاتێ وی و تركیێ گۆت: پێویسته ئه‌نقه‌ره ب كریار حه‌زا خوه ژ بۆ دانوستاندنان ئا‌شكه‌را بكەت، ئه‌سینا پێوه‌ندیێن باش ل گه‌ل ده‌وله‌تێن جیران دخوازیت و ل گه‌ل بنگه‌ها دانوستاندنان دا یه.
دیندیاس ده‌ست نیشان كر، نابیت تركیا سیاسه‌تا سه‌ده‌یا 19ێ د ڤی چاخی دا ب مه‌شینیت، پێویسته تركیا ده‌ست ژ سیاسه‌تا گه‌ف كرنێ و ئێریشكاریێ به‌ردەت و گۆت: ئه‌ڤە نه نامەیا یه‌ونانستانێ یه ژ بۆ ئه‌نقه‌رێ، به‌لكو نامەیا ئه‌ورۆپایێ یه.
ئه‌ڤ گه‌فێن یه‌ونانستانێ ژ بۆ تركیێ، هه‌م ده‌ما ئۆپه‌راسیۆنێن تركیێ یێن لێگه‌رینا په‌ترۆلێ ل ده‌ریایێن هه‌رێمی ل سینۆرێ یه‌ونانستانێ دهێت كو ل ڤێ داویێ ئه‌ڤ چالاكیە زێده‌بوونه.
وه‌زیرێ كارێن ده‌رڤه یێ یه‌ونانستانێ دبێژیت: ئه‌سینا دێ ل سه‌ر هه‌ولێن خوه یێن پاشڤه‌كشاندنا تركیێ به‌رده‌وام بیت، حەتا وێ ده‌ما كو ئه‌ورۆپا جه‌زایان ل سه‌ر تركیه‌یێ د سه‌پینیت.
دهێتە زانین ل رۆژێن رابووری ژی، برۆكسلێ گه‌ف ل تركیه‌یێ خواربوون و دهێتە پێشبینی كرن، سه‌ركرده‌یێن ده‌وله‌تێن ئه‌ورۆپی د جڤینا یه‌كێتییا ئه‌ورۆپایێ یا 10 ڤێ مه‌هێ دا، بریارێ ل سه‌ر سه‌پاندنا جه‌زایان ل سه‌ر تركیه‌یێ بدەت.
