یه‌كێتییا ئه‌ورۆپایێ دانوسته‌ندنان دكه‌ت ژ بۆ كو جه‌زایێن ئابووری ل سه‌ر ده‌وله‌تا تركیێ ب سه‌پینیت، ئه‌ڤ یێك ب سه‌ده‌ما زێده‌بوونا كارێن ئیستفزازی یێن تركیێ نه ل رۆژهه‌لاتا ده‌ریا ناڤین.
یه‌كێتییا ئه‌ورۆپایێ ئیرۆ رۆژا دووشه‌می 7/12/2020ێ ل سه‌ر ئاستا وه‌زیرێن ده‌رڤه، نیقاشا سه‌پاندنا جه‌زایێن ئابووری ل سه‌ر تركیێ دكه‌ت، ب سه‌ده‌ما كارێن لێگه‌رینا په‌ترۆلێ و غازێ كو ل رۆژهه‌لاتا ده‌ریا ناڤین دهێنه مه‌شاندن.
د جڤینا ئیرۆ دا، وه‌زیرێن ده‌رڤه یێن ده‌وله‌تێن ئه‌ندام د یه‌كێتییا ئه‌ورۆپایێ دا، هه‌لسه‌نگاندنێ ژ بۆی ڤان كارێن تركیێ دكه‌ن و پرۆژه‌یا سه‌پاندنا جه‌زایان نیقاش دكه‌ن.
جڤینا ئیرۆ ئاماده‌كارییا جڤینا سه‌ركرده‌یێن ده‌وله‌تێن ئه‌ورۆپایێ یه كو تێ پێشبینی كرن ل رۆژێن 10 و 11 ڤێ مه‌هێ ل برۆكسلێ برێڤه بچیت.
د ڤێ ده‌ربارێ دا، وه‌زیرێ كارێن ده‌رڤه یێ ئه‌لمانیایێ داخویانی دایه و گۆت: سه‌پاندنا جه‌زایان ل سه‌ر ده‌وله‌تا تركیێ د جڤینا وان یا ئیرۆ دا تێ نیقاش كرن، ژ به‌ر كو د مه‌هێن رابووری دا، تركیێ چ هه‌نگاڤ ژ بۆی كێم كرنا ئالۆزییان ل رۆژهه‌لاتا ده‌ریا ناڤین نه ئاڤێتنه.
وه‌زیرێ ئه‌لمانیایێ هه‌روه‌ها ده‌ست نیشان كر، ئه‌لمانیایێ ژ بۆ چێكرنا گۆتوبێژان ل نێڤبه‌را تركیێ و یه‌كێتییا ئه‌ورۆپایێ كه‌تییه ناڤا هه‌ولێن مه‌زن دا، لێ به‌لێ تركیه ده‌ڤ ژ كارێن خوه یێن ئیستفزازی به‌رناده‌ت ب تایبه‌ت ل گه‌ل قوبرسێ ویه‌ونانستانێ.
