گه‌ریلایێن په‌كه‌كێ ل مه‌تینی هاتن هه‌ده‌ف كرن

سێ چه‌كدارێن په‌كه‌كێ ل باشوورێ كوردستانێ كه‌تن به‌ر ئێریشه‌كا باله‌فرێن جه‌نگێ یێن ده‌وله‌تا تركیێ، ئه‌ڤ ئێریش ل چیایێ مه‌تینی پێكهاتییه‌.

ل گۆری ئاگاهیێن كو ئیرۆ رۆژا سێشه‌مبیێ 8/12/2020ێ وه‌زاره‌تا به‌رگریێ یا تركیێ به‌لاڤ كرینه‌، د ئێریشه‌كا ئاسمانی دا‌ كو باله‌فرێن جه‌نگێ ل چیایێ مه‌تینی یێ باشوورێ كوردستانێ ئه‌نجام داییه‌، 3 چه‌كدارێن په‌كه‌كێ هاتینه‌ هه‌ده‌ف كرن و جانێ خوه‌ ژ ده‌ست داینه‌.

ده‌ست نیشان كر، باله‌فران ئه‌و چه‌كدارێن په‌كه‌كێ ل وێ ده‌مێ هه‌ده‌ف كرن، وه‌ختا كو ئاماده‌كاریێن ئه‌نجام دانا ئێریشه‌كێ دكر.

ئه‌ڤ ئێریش هه‌م ده‌م ل گه‌ل راگه‌هاندنا زیانێن جانی یێن په‌كه‌كێ دهێت كو دوهـی وه‌زاره‌تا به‌رگریێ یا تركیێ كوشتنا 11 چه‌كدارێن په‌كه‌كێ ل ناڤچه‌یێن زاپێ و حه‌فته‌نینێ راگه‌هاندبوو.

پارتییا كاركه‌رێن كوردستانێ هێژان چ ئاگاهی ل ده‌ربارا ژ ده‌ست دانا ڤێ هه‌ژمارا گه‌ریلایێن خوه‌ نه‌داینه‌ و ئه‌ڤ ئاگاهیێن ده‌وله‌تا تركیێ نه‌دره‌واندینه‌.