زەلامەکێ خەلکێ ھەرێما کوردستانێ دبێژیت، ئەڤە چەند سالن چەکدارێن پەکەکێ کورەکی وی یێ بچووک رەڤاندیە و تەهدیدا ل وی ژی دکەن.
زەلامەکێ خەلکێ ھەرێما کوردستانێ ب ناڤێ عەدنان جەبار ژ بۆ رۆژنامەڤانەکێ کورد یێ ھەرێما کوردستانێ دایە دیارکرن، نەڤرۆزا سالا 2016ێ ل گەل خێزانا خوە چووبوو گوندەکێ دەڤەرا شوان یا کەرکووکێ. ل ور کورەکێ وی یێ 9 سالی ب ناڤێ عادل جەبار، ژ ئالیێ چەکدارێن پەکەکێ ڤە ھاتە رەڤاندن.
عەدنان جەبار ھەر وھا گۆتیە، ئەو گەلەک ل کورێ خوە گەریا. ل باژێرۆکێ قەلادزێ، ئەفسەرەکێ ئاسایشێ گۆتە وی کو کورێ وی ژ ئالیێ پەکەکێ ڤە ھاتیە رەڤاندن. نە تەنێ کورێ وی، نێزیکی 70 زارۆک د وێ ھەیامێ دا ژ ئالیێ پەکەکێ ڤە ھاتنە رەڤاندن و کورێ وی ژی د ناڤ وان دایە.
وی زلامی دایە زانین، پشتی دەمەکێ بەرپرسەکێ پەکەکێ گۆتبوو وی کو کورێ وی لگەل وانە ژ بەر وێ ژی “خەما نەخۆت! ئەز ژی د تەمەنێ 8 سالیێ دا چوومو قەندیل!”
بابێ وی زارۆکێ کو ھاتیە رەڤاندن، ئاشکەرا کریە، دەما گەلەک رژد بوویە دا کو کورێ خوە ژ وان بستینیت، راستی گەف و تەھدیدان ھاتیە و پەکەکێ گۆتیە وی، “ئەگەر تو ل سەر ڤەگەراندنا کورێ خوە رژد بی، ئەم دێ ئالایەکێ داعشێ دەینە دەستێ کورێ تە و ئەم دێ بێژین مە زارۆکەکی داعش گرتیە!”
ب گۆتنا وی وەلاتیێ کورد، ئەوا کو پەکەکە دکەت کوردینی نینە، مافیاتییە ژ بەر وێ ژی بلا بەرپرس و ئالیێن پێوەندیدار چارەیەکێ بۆ ڤێ یەکێ ببینن.
