رێخستنا په‌كه‌كێ ئه‌ڤرۆ و پاش ده‌رباسبوونا 105 رۆژان، ژ نوو به‌حسا 6 گه‌ریلایێن خوه كر كو ل هه‌رێما بۆتانێ جانێ خوه ژ ده‌ست داینه، په‌كه‌كه كو جوان و زارۆكێن كورد دره‌ڤینیت و ب ل پێناڤێ دۆزه‌كێ ب كوشتن دده‌ت كو چ په‌یوه‌ندی ب كورد و كوردستانێ ڤه نینه، ئه‌ڤرۆ دهێت و گه‌له‌ك بێ شه‌رمانه دبێژیت: «رێبه‌راتی دێ ئارمانجا ڤان جوانان ب جهـ ئینیت»!.
هێزێن پاراستنا گه‌ل هه‌په‌گێ، بالێ له‌شكری یێ رێخستنا په‌كه‌كێ، ئه‌ڤرۆ رۆژا پێنجشه‌مبی 7/1/2021ێ، داخویانییه‌ك به‌لاڤ كرییه و تێدا به‌حسا 6 گه‌ریلایان دكه‌ت كو ل 24 ئیلۆنا سالا رابووری 2020ێ ل هه‌رێما بۆتانێ، د ئێریشه‌كا ده‌وله‌تا تركیێ دا هاتینه هه‌ده‌ف كرن و جانێ خوه ژ ده‌ست داینه.
هه‌په‌گێ وه‌ك هه‌ر جار هه‌موو پێزانین ل ده‌ربارێ ڤان گه‌ریلایان نڤیساندینه، لێ به‌لێ چ ئاماژه ب ته‌مه‌نا وان نه‌كر ژ بۆ كو تاوانا ره‌ڤاندنا زارۆك و چه‌كدار كرنا جوانێن ژێر 18 سالیێ ل سه‌ر ئیسبات نه‌بیت.
هه‌په‌گێ د داخویانیێ دا، په‌سنا هه‌رێما بۆتانێ و گه‌لێ وێ كرییه و دبێژیت: «ئه‌ڤ هه‌رێم ژ بۆی ته‌ڤگه‌را مه پێگه‌هه‌كێ ستراته‌جی یه». یا راست په‌كه‌كه ب ڤێ گۆتنێ راستیێ دبێژیت، بۆتان ستراتیجی یه ژ به‌ر كو سالانه ئه‌ڤ رێخستنه ب سه‌دان خۆرت و جوانێن بۆتانێ د ره‌ڤینیت و ب زۆری كێشی چیایی دكه‌ت و وان ل پێناڤێ «براتییا گه‌لان» و ده‌مۆكراتیك كرنا تركیێ ب كوشتن دده‌ت.
د به‌شه‌كا دی یا داخویانیێ دا هه‌په‌گێ گۆتییه: «رێبه‌راتی دێ ئارمانجا ڤان جوانان پێك ئینیت»، پرسا ل ڤێرێ دهێته كرن ئه‌ڤه‌یه: گه‌لۆ رێبه‌راتییه‌ك كو ل ئیمرالیێ فه‌رمانێن تركیێ جێ به جێ دكه‌ت و رێبه‌راتییه‌ك ل قه‌ندیلێ كو بوویه سه‌رئێش ژ بۆ هه‌ر چار پارچه‌یێن كوردستانێ دێ ب چ ئاوایی ئارمانجا ڤان جوانان جێ به جێ كه‌ت؟!
