بەشا دویەمین
د بەشا یەکەمین یا نڤیسینا خوە دا مە ژ زار دەڤێ نیزامەدین تاش کو د ناڤا پەکەکێ دا ب هەڤال “بۆتان” دهاتە ناسکرن، کر. نیزامەدین تاش ب ئاشکەرا سەدەمێن جودابوونا خوە ژ پەکەکێ ئاشکەرا کربوون، نها ئەم دێ باس ل یەک دی ژ ئەندامێن سەرکرداتیا پەکەکێ ب ناڤێ خەلیل ئاتاچ ب کۆد ناڤێ “ئەبوبەکر” کن و ئەم دێ ژ زادردەڤێ وی باس ل سەدەمێن قووتبوونا وی ژ پەکەکێ کن.
خەلیل ئاتاچ “ئەبوبەکر” کی یە؟
خەلیل ئاتاچ ل سالا 1958ێ ل ناڤچەیا خەلفەت یا پارێزگەها ئۆرفایێ “روحا” ژ داییک بوویە، وەکو ئەو ب خوە دبێژیت جیرانێ مالا عەبدوللا ئۆجەلان بوویە. هەڤدەم ل گەل خواندنا خوە ل بەشێ پەروەردە یا زانینگەهێ ل داویا سالا 1975ێ ژ بۆی پێکئانینا پارتیەکێ تەڤلی رێزێن گرۆپا ئایدۆلۆژیک بوویە و ئەو دبێژیت گرۆپا مە ل وی دەمی 10 کەس بوون و من ب دل و جان کار بۆ کریە. سالا 1978ێ هەڤدەم ل گەل کارێ رێخستنی ل مەرعەشێ خوەندکار بوویە دەما ژ لایێ پۆلیسێن ترکیێ ڤە دهێتە دەستەسەرکرن و سالا 1979ێ ب پلانەکێ کو ژ لایێ ریخستنا زیندانێ ڤە هاتبوو ئامادەکرن، ل جیهێ ئیبراهیم خەلیل یەک ژ زیندانیێن گرۆپا وان د زیندانێ دا ئەو رزگار کریە و پاش 20 رۆژان ل باژێرێ عەنتابێ ب شەمەندەفرێ رەڤییە سووریێ و ل وێ دەرێ چوویە جەم فلستینیان ل لبنانێ، و ل وێ دەرێ پەروەردەیا لەشکری وەرگرتیە، پشت را ل جەم عەبدوللا ئۆجەلان و کەمال پیر و هەژمارەک دی ژ کادران ئەرکا رێخستن و پەروەردەکرنا گەریلایان ب رێڤە بریە.
ل سالا 1983یێ هەیا سالا 2004ێ ئەندامێ سەرکرداتی و کۆنسەیا سەرکرداتیا پەکەکێ بوویە. دەربارا سەدەمێن جودابوونا وی ژ پەکەکێ “حامید گەوهەری ل 25/11/2015ێ هەڤدیتنەک پێکئانیە و تێدا خەلیل ئاتاچ بۆ حامید گەوهەری گۆتیە:
” پەکەکێ دەست ژ ئازادی و سەرخوەبوونا کوردستانێ هلگرت”
“سەدەمێن جودابوونا من ژ پەکەکێ ژ بۆی هندەک خالان ڤەدگەریت، سەرەرای پرسگرێکێن ناڤخوە، پەکەکێ دەست ژ ئازادی و سەرخوەبوونا کوردستانێ هلگرت، ئەز دو جاران ل مووسل و هەولێرێ ل گەل ئەمەریکیان جڤییام. وان گۆتە من، عەبدوللا ئۆجەلان نها ئازاد نابیت و گەر هوون چارەسەرکرنا دۆزا کوردا دانن پێش ئازادکرنا ئۆجەلان ئەم دکارین ب هەڤرا کار بکین. شەر هاتبوو سەکناندن، وان گۆت: سیاسەتا سەکناندنا شەر بەردەوام بکن، ئەم دێ ل گەل ترکان ئاخڤین و هەول دین پرسگرێکا وە چارەسەر بکین. وان گۆت: کۆنسۆلێ مە ل باژارێ ئەدەنا دێ دەربارا کوردان ڤێ ئەرکێ ب رێڤە ببەت.
ژ بۆی بەرسڤ دایینا ئەمەریکیان من پەیوەندی ب جەمیل بایک وسەرکرداتیێ کر، کۆنفەرانسەک پێکئانی و گۆت: ئەم نکارین ل گەل ئەمریکیان رێکەفتنێ بکین، گۆت: ئایدۆلۆژیا مە ل دژی ئەمریکیایە و ئەو دخوازن مە بێخنە رێزا سەهیۆنیستان. ئەز ل گەل عوسمان ئۆجەلان، سەرهات، ئەکرەم، دۆغان، بۆتان، ماهیر، عەلی دووسن، جەلال شرناخ و هەژمارەک دی ژ هەڤالان ل مووسلێ بووم، ل بەغدایێ ئەم جڤییاین و بریار دا ڤەگەرین چییا و گەر مە ئەنجامەک باش ب دەست خست باشە و گەر نە ئەم دێ ژێ جودا بین.
“ئەز بۆ دەما سالەکێ بەرپرسێ ئیستیخباراتا پەکەکێ بووم”
ئەم چووین “کانی جەنگێ” ل سەرێ “کوتەک”ێ ل قەندیلێ و مە دانوستاندن ل گەل سەرکرداتیا پەکەکێ کر. پرسگرێکێن ناڤخوە، تێکلیێن مە ل گەل پەدەکێ و یەنەکێ، مژارا خوەسەریێ و کۆمارا دەمۆکراتیک و راگرتنا شەرێ ل دژی ترکان مە نیقاش کر و مە راگهاند پێویست ناکەت ئەم شەری بکین و مە گۆت دڤێت ژ بۆی کارێ رێخستن و بەرەڤ پێش برنا پرۆسەیا سیاسی کار بکین و پێویست دکەت گەریلا ژی بەشداری ڤێ سیاسەتێ ببن، وان قەبوول نەکر. ژ بەر ڤێ یەکێ ئەم نێزیکی 100 کەسان ب نەچاری ل سالا 2004ێ ژ پەکەکێ جودابووین.
ئەز بۆ دەما سالەکێ بەرپرسێ ئیستیخباراتا پەکەکێ بووم، پێش وی دەمی داخواز ژ من کربوو ئەز وێ ئەرکێ وەرگرم، پشتی چەند رۆژان دانوستاندنان من قەبوولکر. پیویست بوو گرووپەکێ کو ل دەستپێکێ دا هەژمارا وان 35 کەس بوون پەروەردە بکین ژ بۆ رووسیا، لبنان، ئیران، ترکیێ، ئەلمانیا و فەرەنسا و مە پێتر ژ هەر جیهەک دی سەنگ دابوو ترکیێ.
“ژبەرکو من کۆمارا دەمۆکراتیک نەخواست، گەف ل من کرن”
زانیاریێن نهێنی و هندەک پارە ل جەم من بوون ژ بۆی برێڤەبرنا کارێن مە، من گۆتە وان ئەز دێ چم ڤان دەمە دەست کۆمیتەیا مە ل مووسل، ئەز ل ترۆمبێلێ سووار بووم و چووم مووسلێ، هەر تشت من تەسلیمێ “رۆستەم جودی” و “زەکی شنگالی” کرن و ل وێ دەرێ من جودابوونا خوە ئیلان کرراگەهاند. یێن دی ژی کو ل چییا بوون رەڤییان و هاتن جەم مە. کانی یلماز، سیپان رۆژهەلات و کەمال عەفرینی “کەمال سۆر” ژ مە تەرۆر کرن، لێ ئەم دەرباس بووین. 35 سالان مە خزمەتا پەکەکێ کریە، دبیت د کارکرنێ دا شاشییێن من هەبن، لێ بەلێ پرانیا کارێن خوە من بێ پرسگرێک برێڤە برینە. ژبەرکو من کۆمارا دەمۆکراتیک نەخواست، گەف ل من کرن، نها ژی ئەز دوژمناتیا وان ناکم، ب هەزاران گەریلا ب سلۆگانێن “بژی کوردستان، بژی سەرخوەبوون و بژی ئازادی شەهیدکەتن”.
