کۆمەلەیێن ئەحمەدێ خانی کو لقێن وان ل باژێرێن رحا، ئێلھ و ستەنبۆلێ ھەنە، بانگ ل مالباتێن خوەندەکارێن کورد دکەت کو د سالا نوویا پەروەردەھیێ دا ل قۆتابخانان دەرسا کوردی ھلبژێرن و ژ مافێ دەرسا کوردی مفا وەربگرن.
ل ترکیا و باکورێ کوردستانێ ژ بۆ سالا نوویا پەروەردەھیێ دەما بژارتنا دەرسێن بژارتە دەست پێ کر و کۆمەلەیێن چاند و زمان ژ بۆ مالباتێن کورد بانگا هەلبژارتنا زمانێ کوردی دکن.
کۆمەلەیا ئەحمەدێ خانی یا ناڤەندا لێکۆلینێن جڤاکی یا ناڤنەتەوەیی یا رحا و کۆمەلەیا ئەحمەدێ خانی یا چاند و باوەرییا ئێلھێ و کۆمەلەیا چاند و زانست یا شێخ ئەحمەدێ خانی یا ل ناڤچەیا سولتانگازییا ستەنبۆلێ، ژ بۆ ھلبژارتنا دەرسا کوردی یا بژارتە ب داخویانیەکا ھەڤپار بانگ ل مالباتێن کورد کرن.
داخویانیا ھەڤبەشا کۆمەلەیێن ئەحمەدێ خانی وھایە:
زمانێ مە واتەیا ھەبوونا مەیە. مافێ دەرسا ھلبژارتییا کوردی دەرفەتەکە. ئەگەر داخوازا ژ بۆ دەرسا کوردی چەند زێدە بیت دێ باندۆرێ ل سەر دامەزراندنا ھەژمارا مامۆستایێن کوردی ژی کەت.
ئەم بانگ ل مالباتێن کو زارۆکێن وان د پۆلا 5-6-7 و 8ێ دا دخوینن دکین دا کو حەتا 22یێ ڤێ مەھێ سەرەدانا رێڤەبەریا قۆتابخانەیان بکەن و ژ بۆ زارۆکێن خوە دەرسا کوردی ھلبژێرن.
پێشەرۆژا زمانێ مە گرێدایی زارۆکێن مە نە. ئەگەر زارۆکێن مە ب کوردی باخڤن دێ زمانێ مە مینیت و وەندا نابیت. ئەگەر ژ بۆ زمانەکێ خواندن و پەروەردەھی نەبیت، ھەبوونا وی زمانی دکەڤیتە مەترسیێ.
ژ بۆ کو ئەم ل ھەمبەر دیرۆکێ شەرمەزار نەبین دڤێت ئەم زارۆکێن خوە فێری زمانێ دایکێ بکین. خوەدی لێ دەرنەکەتنا زمانێ دایکێ ژ بۆ مرۆڤان کێماسیەکە. دڤێت ھەر کورد ب ئاوایەکی نەتەوەیی ل مژارا دەرسا ھلبژارتی یا کوردی خوەدی دەرکەڤیت. ئەم دوبارە بانگ ل گەلێ خوە دکین دا کو ڤێ مژارێ ژ خوە را بکن خەم.
