سالا 2020ێ دا ژ بەر پەکەکێ 7 ملیار دینار زیان گەھەشتیە خەلکێ ڤێ دەڤەرێ

قایمەقامێ قەزا ئامێدیێ دا خوویاکرن کو، سالا بۆری ژ بەر ھەبوونا بنگەهێن پەکەکێ ل سنۆرێ وان و بۆمبەبارانێن بالەفرێن شەری یێن ترکیێ، زیانێن مادی یێن خەلکی ل سنۆرێ وان 7 ملیار دینار بوونە.

قایمەقامێ ئامێدیێ ئیسمایل مستەفا راگەھاند: ” ژ بەر ھەبوونا بنگەهێن پەکەکێ ل سینۆرێ مە بەردەوام بالەفرێن شەری یێن ترکیێ سینۆرێ قەزا ئامێدیێ بۆمبەباران دکن و ژ بەر وێ ژی 200 گوندێن ناڤچەیێ ب سالانە ھاتینە ڤالا کرن.”

ھەروەھا گۆت: “قەزا ئامێدیێ خوەدی ئاخەکا بھێز و ژینگەهەکا باشە، لێ خەلک ژ بەر ھەبوونا پەکەکێ و مەترسیا سەر جانێ خوە وەک پێویست نکارن سوودێ ژێ وەرگرن.”

قایمەقامێ ئامێدیێ گۆت: “سالانە ھەر ژ لایێ جانی و مادی ڤە زیانێن زێدە دگەھن روونشتڤانێن ناڤچەیێ و سرووشتێ دەڤەرێ. ژ بەر شەرێ پەکەکێ حەتا نها ل سنۆرێ ئامێدیێ 33 ھەموەلاتی شەھید بوونە و ل گۆر ئامارەکێ کو مە کۆم کریە سالا 2020ێ دا 7 ملیار دینار زیان گەھەشتیە سرووشتی و خەلکێ ناڤچەیێ ب گشتی.”

ھەروەھا راگەھاند: ” د بۆمبەباران و شەرێن دەرکەتی دا رەز و باغ شەوتینە کشتووکالا خەلکێ یا ل گوندان ژناڤ چوویە. ژ بەر وێ ئەم داخواز دکین پەکەکە ل ڤێ ناڤچەیێ خوە ڤەکێشیت و بەر ب سنۆرێ خوەیێ راستەقین ڤە بچیت و خەباتا خوە ل وان دەڤەران بکن.”