ل رۆژئاڤایێ کوردستانێ ھێژ ژی پرسا زارۆکێن کو ژ بۆ لەشکەریێ ھاتینە برن چارەسەر نەبوویە و گەلەک خیزان ل بەندا ڤەگەرا زارۆکێن خوە نە. دایکەکا کورد ب ناڤێ مھین ئەحمەد کو کەچا وێ یا 12 سالی ژ بۆ لەشکەریێ ھاتیە برن، ب گری ڤە ژ بۆ رووداوێ دبێژیت، ھێڤیا وێ ئەوە کو کەچا وێ یا بچووک ژ بۆ وێ ڤەگەرینن.
بەرفین ئەلعومەری یا 12 سالی کو ژ دایکبوویا سالا 2008ێ ل باژێرێ عاموودێ یە، د 17ێ مەھا مژدارا سالا 2020ێ دا ژ مال دەردکەڤیت و ل ناڤەندەکا چەکداری دبیتە ئەندام، مەرجێ تەڤلیبوونا وێ ناڤەندێ، قوتبوون ژ خێزانێ یە.
مھین ئەحمەد، دایکا بەرفینێ ژ بۆ رووداوێ دبێژیت: “دەمژمێر یەکێ نیڤرۆ ژ مال دەرکەت، تەلەفۆنەک ژ بۆ وێ هات، تەلەفۆنا خوە ل گەل خوە بر و دەرکەت، تشتەکێ دی نەبر، پشتی 2 رۆژان ئەم چووینە ناڤەندا جوانان، گۆتن ل جەم مە نینە، پشتی وێ دیسان ب 2 رۆژان ئەم چوونە حەسەکێ گۆتن ل جەم مە نینە، لێ جارەکا دی گۆتن ل جەم مەیە و چوویە پەروەردەیێ و تەلەفۆنا وێ دان بابێ وێ.”
مھین ئەحمەد، مۆبایلا کەچا خوە پشتی 20 رۆژان ژ رەڤاندنا وێ، ژ ناڤەندەکا جوانان ل حەسەکێ وەردگریت، ل ھەمان باژێری ئۆفیسا پاراستنا زارۆکان ھەیە کو وەکو پێنگاڤەکێ ژ ئالیێ ھێزێن سووریا دەمۆکراتیک ڤە ژ بۆ رێگرتنا ل بەر چەکدارکرنا زارۆکان ھاتیە دامەزراندن، مالباتا بەرفین ل وێ دەرێ سکالایێ تۆمار دکەن.
ژ 86 کەیسێن برن و چەکدارکرنا زارۆکان کو د سالا 2020ێ دا ل ئۆفیسا پاراستنا زارۆکان ھاتینە تۆمارکرن، 12 زارۆک ب رێیا وێ ئۆفیسێ ژ بۆ مالباتێن وان ھاتینە ڤەگەراندن. رایەدارێن وێ ئۆفیسێ دبێژن، ئەو ھەول ددەن زارۆکێن دی ژی ڤەگەرینن ناڤ مالباتێن وان.
مالباتێن وان زارۆکان بانگ ل لایەنێن پێوەندیدارێن رۆژئاڤایێ کوردستانێ دکەن، زارۆکێن وان ڤەگەرینن.
خالد جەبر، ھەڤسەرۆکێ ئۆفیسا پاراستنا زارۆکان ژ بۆ رووداوێ راگھاند: “پشتی کو ئەم سکالایێن وان (خێزانا) وەردگرین، راستەرێ ئەم رادەستی حکوومەتا باکوور رۆژھلاتێ سووریێ دکین، ئەو ل سەر ل گەل هەسەدێ کار ل سەر دکن، ئەگەر تەڤلی وان بووبە، راستەراست ئەو تینێن ئۆفیسا زارۆکان و پشترا رادەستی مالباتێ دهێتە کرن، جارنا ژی ژ بەر سەرەدەریا خێزانێ ل گەل زارۆکان ژی، زارۆک درەڤن”.
رێگرتن ل بەر چەکدارکرنا زارۆکان، ھشیارکرنا خێزانێ ل سەر چاوانیا سەرەدەریکرن ل گەل زارۆکان دا و قەدەغەکرنا کارێن گران ل سەر زارۆکان، پرۆژەیێن بێ یێن پاراستنا زارۆکان ل رۆژئاڤایێ کوردستانێ نە.
