بەردەڤکێ فەرمی یێ لەشکەرێ رۆژ، بەرسڤا ئەندامێ دەستەیا سەرۆکاتییا پارتییا یەکیتییا دەمۆکراتیک په‌یه‌دێ ئالدار خەلیل دا و راگه‌هاند: «راستییا كو بۆ ھەموو گەلێ کورد دیاربووی ئه‌وه، لەشکەرێ رۆژ نوونەراتییا پرۆژەیا نەتەوه‌یی دکەت و جھەکێ پیرۆز د ناڤا گەلێ کورد دا ھەیە و کی دەستدرێژی ل سه‌ر بکەت، ئەو چەتەیە».
بەردەڤکێ فەرمی یێ ھێزێن پێشمەرگەیێ رۆژ موقەدەم شەرڤان دێرکی، د داخویانیەکێ دا راگه‌ھاند، د دەما کو گەلێ مە ل بەندێ یە ھێڤیێن وی یێن یەکیتییا گشتگیر پێک بهێن و ته‌نگاڤی ب داوی بهێن و هیڤی ل سه‌ر ڤه‌گه‌ریانا پێشمه‌رگه‌یێ رۆژ ئاڤا كرینه، کەسێ ب ناڤێ ئالدار خەلیل داخویانیێن دوور ژ رەھەند و پەرەنسیپێن نەتەوه‌یی ددەت و پێشمەرگەیێن رۆژ ب سیفەتێن ھەری خراپ «چه‌ته» و ناڤێن دی تۆمەتبار دکەت، ئەڤ یەک، ھەقارەت و سڤککرنا ئیرادەیا گەلێ کورد و دەستکەفتێن وێ یە کو ب رێیا سالێن درێژ یێن خەباتێ ب دەست خستینە.
بەردەڤکێ پێشمەرگەیێن رۆژ گۆتنا خوە ئاراستەیی ئالدار خەلیل دکەت و دبێژیت: «چەتە ئەوە، یێ کو خوە ل ھەمبەر پەرەیان بفرۆشیت و ببیته سەدەما کۆچبەر کرن و دەربدەربوونا گەلێ خوە، چەتە ئەوە یێ کو بوویه سەدەما داگیرکرنا ھەرێمێن مە ژ ئالیێ ئارته‌شا ترکیێ ڤە، چەتە ئەوە، یێ باج و پەرەیێن گران ل سەر خه‌لكی سەپاندین و ژ سامانێن وان بێ به‌هر كرین، چەتە ئەوە یێ کو زارۆک رەڤاندینە و بۆ ئەجێندایێن خوە چه‌كدار كرینه و ھەموو مافێن زارۆکان بنپێ کرینە، چەتە ئەوە یێ کو ئیرادەیا خه‌لكی ب ھەموو شێوەیان دزییە و هێلاینه ستووخوار بژین، چەتە ئەوە یێ ژ بۆ بەلاڤکرنا کین و نەفرەتێ كار دكه‌ت و خیانەتێ ل سەمبۆلێن گەلێ کورد دکەت، چەتە ئەوە یێن وەک تە ب دروشمێن دەرەوین بازارێ ب ئێش و ئازارێن خه‌لكی دکەت».
ھەروھا دبێژیت: «راستییا بۆ ھەموو گەلێ کورد خوه‌یابووی ئه‌وه، لەشکەرێ رۆژ نوونەراتیسا پرۆژەیا نەتەوه‌یی دکەت و جھەکی پیرۆز د ناڤا گەلێ کورد دا ھەیە، کی دەستدرێژیێ ل سه‌ر بکەت، ئەو چەتەیە و ژ ئالیێ دژمنێن گەلێ کورد ڤە کرێ کرییە، یان کەسەکی نەخوەش و دەروون خرابە و دڤێت ژ جڤاکێ بێ دوورخستن و ل نەخوەشخانەیا نەخوەشیێن دەروونی و مه‌ژی بهێته چارەسەر کرن».
تەکەز کر ژی، ھەلوەستێن کەسێ ب ناڤێ ئالدار خەلیل نە ژ ئەنجاما تەسادوفێ یە، بەلکو ئەو یەک ژ مەزنترین بازرگانێن شەری یه ل رۆژاڤایێ كوردستانێ.
ئەڤ داخویانییا بەردەڤکێ فەرمی یێ پێشمەرگەیێن رۆژ پشتی وێ تێ، ئەندامێ دەستەیا سەرۆکاتییا په‌یه‌دێ ئالدار خەلیل دوھی د ھەڤپەیڤینەکێ ل گەل «ئۆزگور پۆلتکا» دا راگه‌ھاندبوو، «پێشمەرگەیێن رۆژ نە پێشمەرگە نە، بەلکو ئەو چەتەیێن دەولەتا ترکیێ نە».
