ل عەفرینێ چەکداران 12 کەس کو یەک ژ وان زارۆکە رەڤاندن

ل عەفرینێ چەکداران 12 کەس کو یەک ژ وان زارۆکە رەڤاندن

چەکدارێن ئۆپۆزیسیۆنا سووریێ یێن د بن فەرمانا ترکیێ د چەند رۆژێن بۆری دا 12 کەس ژ عەفرینێ و گوندێن وێ رەڤاندنە و د ناڤا وان دا 5 زارۆک ھەنە. ل ھەمبەر بەردانا رەڤاندیەکێ ژی، چەکدارا داخوازا 50 ھەزار دۆلارا ژ مالباتا وی دکەن.

رێخستنا مافێن مرۆڤان ل عەفرینێ د راپۆرتەکێ دا بەلاڤ کر، گرووپەکێ چەکدار ژ رۆژا 2 ڤێ مەھێ ڤە خۆرتێ ب ناڤێ ئازاد جەمیل نەبۆ ژ ئەفرینێ رەڤاندیە و وی ب ئاوایەکی ھۆڤەنە ئەشکەنجە ددەن.

وی ژێدەری دا زانین ژی، وێ گرووپا چەکدار پەیوەندیێ ب مالباتا ئازاد کریە و گۆتیێ، ھەگەر 50 ھزار دۆلارا نەدەن، دێ ئازاد د بن ئەشکەنجەیێ دا کوژن.

رێخستنا مافێن مۆرۆڤان دیار کر ژی، گرووپا ب ناڤێ ئەمشات رۆژا 13ێ ڤێ مەھێ 5 زارۆک ل باژارۆکێ شیێ رەڤاندن کو یەک ژ وان کوردە و 4 ژی عەرەبێن کۆچبەرن. وێ گرووپێ پشتی رۆژەکێ 4 زارۆکێن عەرەب بەردان و زارۆکێ کورد کو ناڤێ عەزەدین یووسفە، حەتا نھا چارەنڤیسا وی نە دیارە.

وێ رێخستنێ راگھاند ژی، گرووپا ب ناڤێ پۆلیسێن لەشکەری رۆژا 12ێ ڤێ مەھێ وەلاتیێ ب ناڤێ بەشار حەنان رەشید ژ گوندێ شێخھتکۆ یێ ناڤچەیا مابەتا رەڤاندیە و حەتا نھا چارەنڤیسا وی ژی نە دیارە.

رێخستنا مافێن مرۆڤان د ھەمان راپۆرتێ دا بەلاڤ کر ژی، چەکدارێن گرووپا جەبھە ئەل-شام د چەند رۆژێن بۆری دا کالەمێرێ 67 سالی یێ ب ناڤێ عارف ئۆسمان عەلۆ و وەلاتیێ ب ناڤێ عامر محەمەد حەنان ژ گوندێ ھوسێ یێ سەر ب ناڤچەیا مابەتا ڤە رەڤاندن و ھەتا نھا چارەنڤیسا وی نە دیارە.

ھەروھا وێ رێخستنێ دیار کر، گرووپا پۆلیسێن لەشکەری و پۆلیسێ مەدەنی رۆژا 11 ڤێ مەھێ ب سەر گوندێ قورتقولاق یێ ناڤچەیا شەرا دا گرتن و دو کەسێن ب ناڤێ محەمەد حەمۆ و محەمەد خالد رەڤاندن.

رێخستنا مافێن مرۆڤان راگھاند ژی، گرووپا پۆلیسێن لەشکەری رۆژا 6ێ ڤێ مەھێ کەسێ ب ناڤێ حوسێن ئەنوەر عەلی ژ گوندێ حەسەنێ سەر ب ناڤچەیا راجۆ ڤە رەڤاند و دەست دانین سەر ئۆتۆمۆبیلا وی. حەتا نھا چارەنڤسا وی ژی نە دیارە.

ژ دەما داگیرکرنا عەفرینێ ژ لایێ ئارتێشا ترکیێ و گرووپێن چەکدار ڤە د 18ێ ئادارا 1018ێ دا و ل گۆر ئامارێن چالاکڤانێن عەفرینێ، نێزیکی 7 ھزار کەس ژ لایێ چەکداران ڤە ھاتنە رەڤاندن و فدیە ژ وان ھاتنە ستاندن.

پوستێن ھەمان بەش