چێكرنا سه‌رۆكهۆزێن ئاپۆچی بۆ ئێزدییان ژ ئالیێ په‌كه‌كێ ڤه
رێخستنا په‌كه‌كێ ژ ده‌ستپێكا سالا 2020ێ و هه‌تا رۆژا مه یا ئه‌ڤرۆ، هه‌ولێن خوه ژ بۆ تێكدانا جڤاكا ئێزدی بهێز كرینه، پیلانه‌كا نوو ده‌ست پێ كرییه، سه‌رۆكهۆزێن ده‌ڤه‌را شه‌نگالێ هه‌ده‌فا ئه‌ڤێ پیلانێ نه، ب كورتی مرۆڤ دشێت ناڤێ «چێكرنا سه‌رۆكهۆزێن ئاپۆچی بۆ ئێزدییان» ل ئه‌ڤێ پیلانێ بكه‌ت. پێگه‌ها داركا مازی هنده‌ك پێزانینێن تایبه‌ت ل ده‌ربارا ڤێ پیلانا په‌كه‌كێ ب ده‌ست ئێخستینه و كانێ كیژان كه‌ساتیێن ئێزدی نه كو په‌كه‌كێ ب پاره كڕینه و كرینه ئاپۆچی، ئه‌م دێ د ڤێ نڤیسنێ دا یه‌ك ب یه‌ك باس بكه‌ین. هه‌گه‌ر ئاپۆچی نه‌بی كارێ ته ب رێبه‌راتییا هۆزێ ڤه نینه په‌یامنێرێن پێگه‌ها داركا مازی ل باشوورێ كوردستانێ سه‌ردانا شه‌نگالێ و هنده‌ك ژ كه‌مپێن كو خه‌لكێ شه‌نگالێ تێدا‌نه كرینه، وان ئاگاهیێن تایبه‌ت ل ده‌ربارا وان سه‌رۆك هۆزان ب ده‌ست ئێخستینه كو رێخستنا په‌كه‌كێ گوهه‌راندینه و هنده‌ك كه‌سێن دی ل جهێ وان وه‌ك سه‌رۆكهۆز ناڤ كرینه پشتی كو ب په‌ره‌یان ئه‌و كه‌س ژ بۆ خوه كڕین، تشتێ كو هاتییه ژیان كرن ئه‌ڤه‌یه: هه‌ر چ سه‌رۆكهۆزه‌كێ كو ئالیگرێ په‌ده‌كێ یه هاتییه گوهۆرین، یێ كو ده‌ست ژ رێبازا په‌ده‌كێ ژی به‌رنه‌دای، سه‌رۆكهۆزه‌كێ ئاپۆچی ل جهێ وی هاتییه چێكرن و ئه‌ركدار كرن، ب كورتی په‌یاما په‌كه‌كێ گه‌له‌ك زه‌لاله، پێدڤییه ئاپۆچی بی یان ژی كارێ ته ب رێبه‌راتییا هۆزێ ڤه و جهێ ته ل شه‌نگالێ نینه. سه‌رۆكهۆزێن ئێزدی ئه‌وێن په‌كه‌كێ ب پاره كڕین و چێكرین: ناییف شه‌مۆ خودێدا ژ هۆزا ئال حه‌مۆ ناییف شه‌مۆ خودێدا ته‌مه‌ن 56 ساله، خه‌لكێ باژارۆكێ تل عزێره، ل وه‌ختێ ئێریشا ته‌رۆرا داعشێ یا ل سه‌ر شه‌نگالێ، ئه‌و ل گه‌ل مالباتا خوه ئاواره‌ی پارێزگه‌ها دهۆكێ دبیت و ل كه‌مپا باعه‌درێ دمینیت، پاش ده‌رباسبوونا ده‌مه‌كی ناییف ڤه‌دگه‌ریت و ته‌ڤلی جه‌نگا دژی داعشێ دبیت، ل وه‌ختێ دامه‌زراندنا فه‌رماندارییا شه‌نگالێ، ناییف دبیته ئامر سرییا 4 یا فه‌وجا 11 ل گه‌ل برایێ خوه دریعی شه‌مۆ خودێدا كو هێژان ئامر فه‌وجه د ڤێ هێزێ دا ل جه‌م شێخ مجده‌ل ل سحێلا. رێخستنا په‌كه‌كێ ل ناڤه‌راستا سالا رابووری په‌یوه‌ندی ب ناییف دكه‌ت، ئه‌و ل مه‌ها 6/2020ێ ب رێیا كه‌سه‌كی ب ناڤێ قه‌حتان عه‌لی ئوسمان كو ئێك ژ ئه‌ندامێن ئیداره‌ییا خوه‌سه‌ر یا شه‌نگالێ یه، دگه‌ل مه‌زلووم رۆس یێ به‌رپرسێ گشتی یێ په‌كه‌كێ ل شه‌نگالێ كۆم دبیت. د ڤێ كۆمبوونێ دا، مه‌زلووم رۆس ژ ناییف را دبێژیت: ئه‌م دێ هاریكارییا ماددی و مه‌عنه‌وه‌ی بۆ هه‌وه كه‌ین، لێ پێدڤییه هوون ده‌ست ژ ئالیگرییا په‌ده‌كێ به‌رده‌ن و ته‌ڤلی رێخستنێ ببن. مه‌زلووم رۆس ئۆتۆمبێله‌كا ژ جورێ هوندای ره‌نگ سپی مۆدێل 2020 ب ژماره اربیل دا ناییفی. پشتره و ب تایبه‌ت ل رۆژا 24/8/2020ێ، ناییف كۆمبوونه‌كێ ل گه‌ل ئه‌نجوومه‌نا هۆز و كاروبارێن ئۆلی ل شه‌نگالێ كو ژ ئالیێ په‌كه‌كێ ڤه دهێته پشتگریكرن چێدكه‌ت، پاش ڤێ كۆمبوونێ ناییف داخویانی ل كه‌نالێ چرا یا په‌كه‌كێ ل دژی حكوومه‌تا ئیراقێ و حكوومه‌تا باشوورێ كوردستانێ یا ئاڤاكرنا سه‌نته‌را هه‌مئاهه‌نگییا هه‌ڤبه‌ش دا. خدر حه‌جی میرزا ژ هۆزا قه‌یرانی: خدر حه‌جی میرزا ته‌مه‌ن 66 ساله، ئه‌و خه‌لكێ كۆمه‌لگه‌ها سیبا شێخ خدر یا گرێدای باژارۆكێ تل عزێره، كادرێ په‌ده‌كێ بوو، پاش بوویه‌رێن 3 ته‌باخا 2014ێ، ئاواره‌ی دهۆكێ دبیت و ل كه‌مپا چه‌م مشكۆ دمینیت، ل ده‌ما ئێریشا حه‌شدا شه‌عبی یا سه‌ر شه‌نگالێ، ئه‌و ته‌ڤلی حه‌شدێ دبیت، لێ حه‌شدێ تشته‌ك بۆ نه‌كر، پشتره په‌یوه‌ندی ب په‌كه‌كێ كر و ل مه‌ها 3 یا سالا 2020ێ، په‌كه‌كێ ئۆتۆمبێله‌كه هوندای لاندكرۆز پێ دایه. نها رێخستنا په‌كه‌كێ خدر وه‌ك سه‌رۆكێ هۆزا قه‌یرانی ناس دكه‌ت، لێ به‌لێ د ئه‌ساس دا، برایێ خدر یێ ب ناڤێ میرزا حه‌جی میرزا سه‌رۆكێ ره‌سه‌ن یێ ڤێ هۆزێ یه و نها ئه‌و ل كه‌مپا چه‌م مشكۆ یه. سه‌یدۆ گرۆ ئه‌لیاس ژ هۆزا فه‌قیر: سه‌یدۆ گرۆ ئه‌لیاس ژ مالباتا جندۆ یه، ته‌مه‌ن 49 ساله خه‌لكێ باژارۆكێ گر عزێره، ئه‌ندامێ كۆمیتا ناڤچه‌یا گرعزێر یا په‌ده‌كێ بوو، پاش ئێریشا داعشێ یا 3 ته‌باخا سالا 2014ێ، ئاواره‌ی دهۆكێ دبیت و ل كه‌مپا بێرسڤێ یا گرێدای باژارێ زاخۆ دمینیت، ل ده‌ستپێكا سالا 2020ێ په‌كه‌كێ په‌یوه‌ندی پێ كر و ئه‌ڤ زه‌لامه ژی ب ئۆتۆمبێله‌كا هوندای لاندكرۆز دهێته كڕین. نها په‌كه‌كه سه‌یدۆ وه‌ك سه‌رۆكێ هۆزا مالباتا جندۆ ناس دكه‌ت و ل سه‌ر وی ئه‌ساسێ ره‌فتارێ دگه‌ل دا دكه‌ت. خه‌له‌ف سلۆ عه‌تۆ حه‌مۆ كو ب خه‌له‌ف ته‌علا دهێته ناس كرن – ژ هۆزا فه‌قیره: خه‌له‌ف ژ مالباتا جندۆ یه ته‌مه‌ن 59 ساله خه‌لكێ باژارۆكێ گر عزێره، ناڤبووری ب ئه‌گه‌را گرفتێن جڤاكی د سالێن نۆتان دا هاتبوو باشوورێ كوردستانێ، ئه‌و ل مه‌ها 8 یا سالا 2020ێ چوویه ئاه‌لمانیا و ل وێرێ ته‌ڤلی رێخستنا په‌كه‌كێ دبیت، به‌ری كۆچ كرنێ وی ئۆتۆمبێله‌كا تۆیۆتا ره‌نگ سپی مۆدێل 2019 ژ په‌كه‌كێ وه‌ك خه‌لات وه‌رگرتبوو، ناڤبووی ژ به‌ر به‌رژه‌وه‌ندیێن خوه یێن تایبه‌ت په‌یوه‌ندی ب په‌كه‌كێ كر، هه‌روه‌ها مالباتا حه‌مۆ سه‌رۆكهۆزێ خوه هه‌یه كو ئه‌و ژی مالباتا ده‌خیل حه‌مۆ یه. عومه‌ر عه‌جاج مراد ژ چینا شێخه: عومه‌ر عه‌جاج ته‌مه‌ن 42 ساله، خه‌لكێ كۆمه‌لگه‌ها گوهبه‌ل یا گرێدای سنوونێ یه، په‌كه‌كێ ئۆتۆمبێله‌كا ژ جورێ تۆیۆتا پیكئاپ پێ دایه، برایێ وی ب ناڤێ حه‌ماد عه‌جاج مراد، ئامر فه‌وجه د لیوایا شه‌نگالێ دا. هێژای گۆتنێ یه، ئه‌ڤ هنده‌ك نموونه نه ژ وان كه‌ساتیێن ئێزدی یێن كو رێخستنا په‌كه‌كێ ب پاره كڕینه، كرینه ئاپۆچی و ژ بۆ پاراستنا به‌رژه‌وه‌ندیێن رێخستنا خوه ل شه‌نگالێ ئه‌و كرینه سه‌رۆكهۆز. پاش فه‌رمانا 2014ێ یا شنگالێ هه‌تا پاش رزگار كرنێ، په‌كه‌كه ب ئاوایه‌كێ سیستماتیك كه‌تییه د ناڤا هه‌ولێن تێكدانا جڤاكا گه‌لێ ئێزدی دا، دخوازیت ب ئایدۆلۆژییا خۆ هه‌ر تشتی ب گوهۆ‌ریت وه‌ك نه‌ریت، ئۆل و باوه‌رداری، ژێیاتییا نه‌ته‌وه و كوردبوونێ، ب كورتی ل سه‌ر مه‌ژیكێ وان هه‌ر تشتی دكه‌ت، دخوازیت ته‌رزێ ژیانا ڤێ جڤاكا ره‌سن ژ نوو ڤه ل گۆر ئایدۆلۆژی و به‌رژه‌وه‌ندییا رێكخستنا خۆ ئاڤا بكه‌ت، له‌وما پێویسته گه‌لێ ئێزدی ژ ڤێ سیاسه‌تا قرێژ یا په‌كه‌كێ هایدار بن و نه‌هێلن جڤاكا وان ببیته سۆته‌مه‌نییا ڤێ رێخستنا نه‌نه‌ته‌وه‌یی. لێ به‌لێ تشتێ عه‌جێب ئه‌ڤه‌یه، ده‌ما كو مرۆڤ ل دیرۆكا رێخستنا په‌كه‌كێ دنێریت ل وه‌ختێ ژ نوو هاتییه دامه‌زراندن ئانكو ژ سالێن هه‌شتێیان، ڤێ رێخستنێ سه‌رۆكهۆزێن نه‌ته‌وه‌ی ل باكورێ وه‌لات ته‌سفییه دكرن و ژێرا دگۆتن ئه‌ڤ فه‌ئودالن و ئه‌گه‌را پاشكه‌تنا دۆزا گه‌لێ كوردن، لێ په‌كه‌كه ژ نووڤه هاتییه و سه‌رۆكهۆزان ب پاره چێدكه‌ت و وان ل سه‌ر بنگه‌ها ئایدۆلۆژییا ئاپۆ په‌روه‌رده دكه‌ت!. 
