ئاژانسا ریوتەرسێ راگەهاند ئیرۆ رۆژا یەکشەمبێ 17/1/2021ێ کەشتیەکا بارھەلگرا رووسیایێ ل ھەمبەر بەراڤێن ھەرێما بارتن ل سەر دەریا رەش ژێرئاڤ بوویە.
بەرپرس و مەدیایێة ھەرێمی دانە زانین کو لاشێن دو کارمەندێن کەشتیێ مری ژ ئاڤا دەریایێ ھاتنە دەرئانین. والیێ ھەرێما بارتن سنان گونەر ژبۆ ئاژانسا ئانادۆلویا ترکیێ گۆتیە، کەشتیا باری یا رووسی، ئارڤن ل بەراڤێن ھەرێما ئنکومو ژبەر نەباشیا رەوشا ھەوایێ ژێرئاڤ بوویە.
والی دبێژیت، ژ ھەژمارا 13 کارمەندێن کەشتیێ حەتا نھا 5 کەس ھاتنە رزگار کرن، لێ راستەراست سەدەما ژێرئاڤبوونێ حەتا نھا نەھاتیە زەلال کرن. سنان گونەر دبێژیت “حەتا نھا، 5 کەس ھاتنە رزگار کرن، گەمیا رزگارکرنێ دو لاشێن مری دەرئانینە.”
ھەروھا گونەر ددەتە زانین کو ل ژێر مەرجێن خراب یێن رەوشا ھەوایی دا ھەولدانێن رزگار کرنێ بەردەوامن، دهێتە تەخمین کرن کو دبیت کەسێن مایی د کەشتیێ دا ل کوراتیا 600-700 مەتران ل ژێر ئاڤا دەریایێ بھێنە دیتن، ژبۆ ڤێ مەبەستێ ژی کەشتیەکا جەنگی ل وان دگەریت ئەگەر کو دەلیڤا فرینان ژی ھەبیت ئەو دێ داخوازا فرۆکا ھەلیکۆپتەر ژی کەن.
