كارته‌كا دی یا په‌كه‌كێ ژ بۆ تێكبرنا دانوستاندنێن كوردی ل رۆژئاڤا كوردستانێ راستی شكه‌ستنێ هات، ده‌ما ڤێ رێخستنێ هه‌ول دای ب رێیا داخویانیێن به‌رپرسێن په‌یه‌دێ، دانوستاندنان ئاسته‌نگ بكه‌ن، ئه‌ندامه‌كێ ئه‌نجوومنا نشتیمانییا كوردی دبێژیت: «ئه‌مه‌ریكا ل سه‌ر رێككه‌فتنێ رژده و ئه‌ڤ كارته ژی د ده‌ستێ په‌كه‌كێ دا سۆتی یه».
ل رۆژێن رابووری ئالدار خه‌لیل، سه‌ركرده‌یێ په‌یه‌دێ ل رۆژئاڤا كوردستانێ، هێرشێن نه‌ره‌وا ل سه‌ر پێشمه‌رگه‌یێ رۆژ كر، كارڤه‌دانێن مه‌زن ل دووڤ ڤێ هێرشێ هاتن و چاڤدێرێن سیاسی پێشبینی كرن كو ئه‌ڤ ئاخفتنێن ئالدار كاریگه‌رییه‌كا خراب ل سه‌ر دانوستاندنێن كوردی ل رۆژئاڤا كوردستانێ یێن د نیڤبه‌را ئه‌نه‌كه‌سێ و په‌یه‌دێ دا بكه‌ت.
د ڤێ ده‌ربارێ دا، كاوه عه‌زیزی ئه‌ندامێ ئه‌نجوومه‌نا نشتیمانییا كوردی راگهاند كو په‌كه‌كێ ب ڤێ یه‌كێ هه‌ول دایه ئاسته‌نگان بۆ دانوستاندنان چێبكه‌ت، بۆ ڤێ مه‌به‌ستێ ژی كه‌سه‌كێ توندره‌و یێ وه‌ك ئالدار خه‌لیل بكارئینا، چونكه هه‌تا نها ئه‌و سه‌ركرده‌یێ په‌یه‌دێ وه‌ك په‌كه‌كێ و قه‌ندیلی بیر دكه‌ت.
هه‌روه‌ها گۆت: «وه‌ها دیاره ئه‌مه‌ریكا ل سه‌ر پرسا رێككه‌فتنا ئالیێن كوردی ل رۆژئاڤا كوردستانێ رژده، له‌وما هه‌ر د زوو دا بالیۆزخانه‌یا ئه‌مه‌ریكایێ ل دیمه‌شقێ ته‌كه‌زی ل سه‌ر دانوستاندنان و رێككه‌فتنێ كر، ئه‌ڤێ یه‌كێ داخویانیێن ئالدار خه‌لیل بێ بوها كرن كو ڤێ جارێ ئاخفتنێن وی د ناڤ په‌یه‌دێ ژی دا چ پێشوازییه‌ك لێ نه‌هات كرن».
كاوه عه‌زیزی ل داوییا داخویانیێ گۆت: «هه‌گه‌ر ب قه‌ندیلی بیت، دێ رێ ل به‌ر دانوستاندن و رێككه‌فتنێ هێته گرتن، لێ هه‌بوونا ئه‌مه‌ریكایێ د ڤێ پێڤاژۆیێ دا كو ل سه‌ر داخوازییا ئه‌نه‌كه‌سێ بوو، ئاسته‌نگییه‌كا گه‌له‌ك مه‌زن بۆ قه‌ندیلی و په‌كه‌كێ چێكرییه و هه‌ولێن وان یێن تێكبرنا دانوستاندنان راستی شكه‌ستنێ هاتینه».
