دوو ته‌قینێن مه‌زن ئیرۆ ل ناڤه‌ندا باژێرێ به‌غدا پایته‌ختا ئیراقێ چێبوون، 32 كه‌س هاتنه كوشتن و 110 كه‌س بریندار بوون.
ئیرۆ رۆژا پێنجشه‌می 21/1/2021ێ، بۆمبه‌كا چاندی ل یێك ژ ناڤچه‌یێن پری قه‌ره‌بالغ یێن به‌غدایێ ته‌قیا و پشتی كو خه‌لك ل جیێ ته‌قینێ كۆمبوویی، كه‌سه‌كی ب كه‌مه‌را تی ئێن تی كری خوه ته‌قاند.
چاڤكانیێن ئه‌وله‌هیێ ئا‌شكه‌را كربوون كو ل گۆر ئامارێن ده‌ستپێكی 10 كه‌سان جانێ خوه ژ ده‌ست دا و نێزی 20 كه‌سێن دن بریندار كه‌تنه.
لێ به‌لێ پشترا وه‌زاره‌تنا ته‌ندروستیێ یا ئیراقێ داخویانی دا و ئا‌شكه‌را كر، 32 كه‌س هاتنه كوشتن و 110 كه‌س بریندار بوونه.
ته‌قین ل مه‌یدانا ب ناڤێ ته‌یه‌ران یا ناڤه‌ندا به‌غدایێ ل نێزی ناڤچه‌یا ناڤدار یا ب ناڤێ باب شه‌رقی چێبووینه، هێزێن ئه‌وله‌هیێ دۆربه‌را ناڤچه‌یێ گرتنه.
