مژارا ئازادیا رادەربرینێ و ئازاد ھزرکرنێ، ئازاد ژیان کرن و ب ئازادی تەڤگەریان، ژ وان مژارانە کو پەکەکە ژ ھەر لایەنەکێ دی پێتر پرۆپاگندەیێ بۆ دکەت و بازارێ خوە پێ گەرم دکەت، جارنا دەما پەکەکە باس ل ئازادیێ دکەت مرۆڤەک نە شاھرەزا بیت دێ وسا هزرکەت کو پەیڤا ئازادی ھەر ل گەل پەیدابوونا پەکەکێ پەیدابوویە و بەرا کو پەکەکە ھەبیت هیچ تشتەک ب ناڤێ ئازادیێ نەبوویە! لێ بەلێ یا راست ئازادی ل جەم پەکەکێ ب تەنێ د ڤێ یەکێ دا دهێتە قەبوولکرن کو تو د ناڤا چارچووڤا ئایدۆلۆژیا پەکەکێ دا کار بکەی، ھەر دەما تە خواست ژ پەکەکێ جودا ببی یان ژی پەکەکێ رەخنە بکەی وی دەمی ئازادیێ هیچ رامانەک نامینیت، وی دەمی تو دبیە ئاژان، جاش، خوەفرۆش و میتا ترکان و تە هیچ بھایێ خوە نامینیت، ھەر چەند تو کورد پەروەر بی ژی، لێ بەلێ دەما تو ژ پەکەکێ جودابووی وی دەمی تو خاین و ئاژان و خوە فرۆتیی.
ل سەر ڤێ بنگەھێ پەکەکە ھەر کەسەکێ کو ژێ جودا دبیت ب خائین ب ناڤ دکەت. د بەشا یەک و دو دا مە باسی سەدەمێن قوتبوونا ھەر یەک ژ نیزامەدین تاش ب کۆد ناڤێ “بۆتان” و خەلیل ئاتاج ب کۆد ناڤێ “ئەبوبەکر” کر، د ڤێ بەشا نڤیسا خوە دا ژی ئەم دێ ل زاردەڤێ یەک دی ژ ئەندامێن کۆنسەیا سەرکرداتیا پەکەکێ کو برایێ ئۆجەلان ب خوەیە، ئانکو “عۆسمان ئۆجەلان”ێ ب کۆد ناڤێ فەرھاد باس ل سەدەمێن جودابوونا وی ژ پەکەکێ کەین، ئەم دێ ژ زار دەڤێ وی زانین نەرینا پەکەکێ ل سەر ب دەولەت بوونا باشوور چییە، بۆچی دژاتی دکر و بۆچی ھەر کەسێ پشتەڤانی ل باشوور کربا ب ئاژان و خوەفرۆش دھاتە سووچبارکرن، ئەم دێ ب زەلالی سەدەما جودابوونا عۆسمان ئۆجەلان ژ پەکەکێ زانین.
عۆسمان ئۆجەلان کییە؟
عۆسمان ئۆجەلان “فەرھاد”: ل سالا 1958ێ ل گوندێ عەمار ل ناڤچەیا فەلەدین یا پارێزگەھا ئۆرفایێ ژ دایک بوویە. وی ژ بۆی مامۆستاتیێ خواندییە، لێ ژبەر تەڤلیبوونا وی د بزاڤا کوردی یا باکورێ کوردستانێ دا نەشییا ببیتە مامۆستا، وەکو ئەو ب خوە دبێژیت د سالا 1975ێ دا، ژییێ وی 17 سال بوو دەما شۆرەشا ئیلۆنێ راوەستیای، ب راوەستانا شۆرەشێ نیقاش د ناڤبەرا کوردێن باکور دا دەردکەڤیت، ئەو ل گەل برایێ خوە “ئۆجالان” دەست ب خەباتێ دکەت و ل دووڤ رێبازا برایێ خوە دچیت. ل سەر ڤێ خەباتێ د ھەڤدیتنەکێ دا ل گەل حامد گوھەری ل رۆژا 1/12/2015ێ دا ل سەر بەشدار بوونا د ڤێ بزاڤێ دا دبێژیت:
بزاڤا مە ژ دو خەتێن چەپ و نەتەوی پێک دھات. ئەز وەکو عۆسمان ئۆجەلان بەشداری خەتا نەتەوی بووم، لێ بەلێ رێخستن د دەستێ چەپان دا بوو و ئەم خەتا لاواز بووین. من خەبات دکر لایەنێ نەتەوی پێتر بەر ب پێش بچیت و سەربکەڤیت، من دگۆت ئەز سۆسیالیزم و دەمۆکراسیێ ناخوازم گەر د خزمەتا نەتەوەیا کورد دەا نەبیت و ئەز تەڤلی نابم. سالا 1975-1980ێ سەردەما دانینا ئایدۆلۆژیا بزاڤا نەتەوی بوو. ل سالا 1975ێ بۆ دەما سێ سالان ھەیا دامەزراندنا پەکەکێ ئەز ئالیگر بووم. عەبدوڵا ئۆجەلان، حەقی قەرار و کەمال پیر پەکەکە دامەزراند. ئۆجەلان نوونەراتیا نەتەوا کورد دکر، حەقی قەرار نوونەراتیا نەتەوەیا لاز و کەمال پیر نوونەراتیا گورجیا دکر. ئەڤ سێ نەتەوە ل ترکیێ دھاتنە ئاسمیلە کرن و وەخت بوو ژناڤ بچن، ڤان سێ کەسا خوەست نەتەوەیێن وان ئاسمیلە نەبن، لۆما پەکەکە دامەزراند.
سەدەمێن جودابوونا عۆسمان ئۆجەلان ژ پەکەکێ چبوون ؟
عۆسمان ئۆجەلان دەربارا جودابوونا خوە ژ پەکەکێ دبێژیت: “داویا سالا 2002یێ، مە جڤینەکا بەرفرەھ ل خنێرە ئەنجام دا. جەمیل بایک، دوران کالکان، عەلی حەیدەر قایتان، مستەفا کاراسوو و ئەز کو ئەندامێن کۆنسەیا سەرکرداتیا پەکەکێ بووین، بەشداری وێ جڤینێ بووین. ژ بلی من، وان 4 کەسا بریار دابوو، جارەکا دی ل دژی پەدەکێ شەری بکەن، دگۆت گەر سەدام بچیت دێ پەدەکە بیتە دەولەت و ب دەولەت بوونا وێ د بەرژەوەندیا پەکەکێ دا نینە، دڤێت ب شەر ئەم رێ ل ڤێ یەکێ بگرین. من رێ ل وان گرت و گۆتە وان ل جھێ رێگرتنێ، دڤێت هاریکاریا وان بکەین دەولەتێ ئاڤا بکەن.
تاوانێن ئۆسمان ئۆجەلان د ناڤا پەکەکێ دە چ بوون؟
سالا 2004ێ ئاپۆ ل سەر کەمالیزمێ پەیڤی و ئەڤ چەندە ژ بۆ من یا نەخوەش بوو، ژبەرکو کەمالیزم ل دژی کوردان بوو و باشی ژ بۆی مە تێدا نینە. مژارەکا دی کو ژ بۆی من گران بوو، لھەڤھاتنا جەمیل بایک ل گەل ئیرانێ بوو کو من بکوژن. ھندەک کەس ل ئیرانێ تەڤلی پەکەکێ بووبوون و وان گۆت کو ئەز هشیاری خوە بم. ئەو بوون سەدەم کو ژ پەکەکێ جودا ببم. بەرا وی دەمی ئەز دو جاران ژ لایێ پەکەکێ ھاتبووم زیندانکرن، جارا یەکێ ل ئیرانێ و جارا دویێ ل پیربەلایێ ل پشتا زاخۆیێ.
من د ناڤا پەکەکێ دا سێ تاوان ھەبوون. یا یەکەمین ل سەر مژارا دوژمناتی کرنا پارتی و ئێکەتیێ بوو، من دگۆت بلا ئەم دژمناتیا وان نەکەین و وەکو پرەکێ مفا ژ وان وەرگرین ژ بۆی ئاڤاکرنا پەیوەندییان ل گەل ئەورۆپایێ، یا دویێ من دگۆت بلا د ناڤا پەکەکێ دا مافێن مرۆڤان ھەبن و داویێ ب کوشتنا د ناڤا پەکەکێ دا بینن، یا سێیەمین رێکەفتنەکا نەتەوی ئیمزا بکەین کو ھێزێن کوردی یەکگرتی بن. ئەڤە ژ ل سەر من کرنە تاوان و ئەز نەچار کرم ل رۆژا 1/6/2014ێ ژ پەکەکێ جودا ببم”.
د بەشا چارەمینا نڤیسا خوە دا ئەم دێ باس ل یەک دین ژ سەرکردەیێن جودابوویی ژ رێخستنا پەکەکێ ب ناڤێ “مستەفا شەفیق”ێ ب کۆدناڤێ ئاری کەین و ئەم دێ ژ زاردەڤێ وی ب خوە سەدەمێن جودابوونا وی ژ پەکەکێ زانین.
ل بەندا مە بن….
