رۆمانا سەلیم چوروککایا یا ب ناڤێ “در. سەعید مە کلیتا چیێ وەندا کر” کو ژیانا پێشمەرگەیێ شەھید در. سەعید چوروککایا کریە مژار، ل ترکیا ھاتە قەدەغە کرن و دەربارێ نڤیسکارێ پرتووکێ وەشانخانەیا “دۆز”ێ دا ژی سکالا ھاتە تۆمارکرن.
ل سەر داخوازا دۆزگەریا چاپەمەنیێ یا ستەنبۆلێ و ب بریارا دادگەھا جەزایێن سەرەکی یا ستەنبۆلێ رۆمانا سەلیم چوروککایا یا ب ناڤێ “در. سەعید مە کلیتا چیێ وەندا کر” کو ژ وەشانخانەیا دۆزێ هاتیە چاپکرن، ھاتە قەدەغەکرن.
دادگەھێ بریار دا کو پەرتووک بهێتە قەدەغەکرن و ژ بازاری بهێتە کۆمکرن و ھەروەھا دەربارێ نڤیساکرێ پەرتووکێ سەلیم چوروککایا و وەشانخانەیا دۆز دا ژی سکالا هاتە ڤەکرن.
رێڤەبر و ئەدیتۆرێ گشتی یێ وەشانخانەیا دۆز کۆرۆگلو کارائاسلان ژ بۆ رووداوێ دیار کر کو دەربارێ پەرتووکێ دا ل دادگەھا ستەنبۆلێ ئیفادەیا وی ھاتیە ستاندن. کۆرۆگلو کارائاسلان دبێژیت: “ئەوێن تەحەمولا ژیانا در. سەعید نەکری، ئەوێن تەحەمولا گۆرا در. سەعید نەکری تەحەمولا رۆمانا در. سەعید ژی ناکەن.
رۆمانا “در. سەعید مە کلیتا چیێ وەندا کر” ژ لایێ دادگەھا ستەنبۆلێ ڤە ھاتە قەدەغەکرن، دەرحەقێ نیڤیسکار سەلم چوروککایا و وەشانخانەیا دۆز دە ب داخوازا سزادانێ لێپرسن دەستپێکرن. رۆژا 22یێ چلەیا 2021ێ ل دۆزگەریا ستەنبۆلێ ئیفادەیا من گرتن. ب بەهانەیا مە پەسنا رێخستنا تیرۆرێ دایە و ئەندامێن ھێزێن ئەولەکاریێ وەک ئارمانج نیشان دایە.
“کارائاسلان ھەروھا دا زانین کو ژ بۆ ھەردو چاپێن ترکی و کوردی ژ جھێ سزایێ 20 ھەزار لیرەیێن ترکی وەکو سزایێ ژ وەشانخانەیا دۆزێ هاتینە دیارکرن. رێڤەبر و ئەدیتۆرێ گشتی یێ وەشانخانەیا دۆزێ د ھەمان دەمی دا دیار کر کو ئەگەر د ھەیاما 10 رۆژان دا سزایێ پارە نەدەن دێ ژ بلی ڤێ دۆزێ ئێکا دی ژی ل سەر وان هێتە ڤەکرن و ب ڤی رەنگی ئاخڤت: “مە گۆت کو مە چ پەسنێ رێخستنا ناڤبۆری نەدایە، ئەم دێ بریارا ئیتراز بکەین. ھەروھا مە گۆت بێیی کو لێکۆلین دەربارێ تەڤاھیا پەرتووکێ دا بهێتە کرن بریار ھاتیە دان.
“دیرۆکا سەد سالێن داوی ل باکورێ کوردستانێ د ناڤ رۆمانا “در. سەعید مە کلیتا چیێ وەندا کر” دا ب ھەستیاری ب دەستێ سەلیم چوروککایا، برایێ سەعید چوروککایا ڤە ھاتیە نڤیسین. سەعید چوروککایا ئانکو ب ناڤێ ناسکری دۆکتۆر سلێمان رۆژا 26ێ جۆتمەھا 2016ێ، ل گوندێ تیسخرابا مەزنا باشیکێ و د دەمەکێ دا کو مژوولی پووچکرنا بۆمبەیەکا داعشێ بوو، بۆمبە پێ ڤە تەقیا و د ئەنجامێ دا ب گرانی بریندار بوو. پشتی کو بۆ دەرمانکرنێ بۆ ئەلمانیا ھاتیە ڤەگوھاستن، رۆژا 30ێ جۆتمەھا 2016ێ ژ بەر گرانیا برینا خوە شەھید ببوو.
