“حەفتەیا بهێت بۆ کوردستانێ حەفتەیەکا ھەستیارە”

ئەندامەکێ شاندا دانووستانکار یا حکوومەتا هەرێما کوردستانێ راگھاند، حەفتەیا بهێت بۆ پشکا بوودجەیا کوردستانێ حەفتەیەکا ھەستیار و گرینگە.

سەرۆکێ فەرمانگەھا ھەماھەنگی و دووڤچوونێ و ئەندامێ شاندا دانووستانکاریا حکوومەتا هەرێما کوردستانێ، عەبدولحەکیم خەسرۆ ژ بۆ باس نیۆزێ راگهاند، ڤێ حەفتەیێ ئەم ل گەل کۆمیسیۆنا دارایی یا پارلامانێ ئیراقێ ل سەر پشکا کوردستانێ کۆم بووین. د کۆمبوونێ دا نێرینێن جودا ھەبوون. مە ژی نێرینا خوە ئانی زمان و مە بەرەڤانی ل پشکا کوردستانێ یا د قانوونا بوودجەیا ئراقێ دا ھاتیە دەستنیشانکرن، کر.

عەبدولحەکیم خەسرۆ ھەر وھا گۆت، مە د جڤینێ دا ئاگاھیێن ھوور و زێدە ل سەر فرۆتن و دەرخستنا نەفتێ دان. ئەڤ ژی بوو سەبەب کو ھەلوەستا ئالیێ ئیراقی پیچەکێ بهێتە گوھەرتن.

وی ئەندامێ شاندا حکوومەتا کوردستانێ ئانی زمان ژی، دانووستاندن حەتا نھا ژی بەردەوامن و گۆت، حەفتەیا بهێت حەفتەیەک ھەستیار و گرینگە بۆ کوردستانێ. ژ بەر کو کۆمیسیۆنا دارایی یا پارلامانێ ئیراقێ دێ راپۆرتا خوە تەسلیمی سەرۆکاتیا پارلامانێ کەت.

ب گۆتنا وی بەرپرسێ حکوومەتێ، ئەگەر ئەو پشکا کوردستانێ یا کو د قانوونا بوودجە دا ھاتیە دەستنیشانکرن، ژ ئالیێ پارلامانی ڤە بهێتە پەسەندکرن، دێ بوودجەیا کوردستانێ هێتە دایین.