نەتەوەیێن یەکگرتی رادگھینیت، نێزیکی 27 ھەزار زارۆکێن داعشێ ل کامپا ھۆلێ یا رۆژئاڤایێ کوردستانێ د رەوشەکا خراپ دا دژین و بانگ ل وەلاتان دکەت تا کو وان زارۆکان ڤەگەرینن وەلاتێن خوە.
ئالیکارێ سەکرەتەرێ گشتی یێ نەتەوێن یەکگرتی د پرسێن دژی تەرۆرێ دا ڤلادیمێر ئیڤانۆڤچ ڤۆرۆنکۆڤ د جڤینەکا نەفەرمی یا ئەنجوومەنێ ئاسایشا ناڤدەولەتی دا کو دوھی ب ئاوایەکی ئۆنلاین ھاتبوو گرێدان گۆت: “رەوش ژ بۆ زارۆکێن کو د کامپا ھۆلێ دا دژین ترسناکە، ئەڤ یەک ژ بابەتێن ھەری پێویستە کو دڤێت کار ل سەر بهێتە کرن.”
ڤۆرۆنکۆڤ دیار کر، نێزیکی 27 ھەزار زارۆکێن داعشێ د کامپێ دا ئاسێ مانە و هێلانا وان د وێ چارەنڤیسێ دا مەترسی ھەیە کو ئەو زارۆک د ناڤا کامپێ دا بکەڤنە بن باندۆرا توندرەویێ.
وی بەرپرسێ نەتەوێن یەکگرتی دیار کر، زارۆکێن 60 وەلاتان د کامپێن ل رۆژئاڤایێ کوردستانێ و سووریێ دا ئاسێ مانە و گۆت کو وەلاتێن وان زارۆکان د بەر چارەنڤیسا وان دا بەرپرسیارن.
کامپا ھۆلێ ل باژێرێ حەسەکێ یێ رۆژئاڤایێ کوردستانێ یە کو یەک ژ مەزنترین کامپێن سووریا و رۆژئاڤایێ کوردستانێ یە و نھا ل گۆری رایەدارێن نەتەوەیێن یەکگرتی 62 ھەزار کەس لێ دژین و پرانیا وان ژن و زارۆکێن داعشێ نە.
