ل باکورێ کوردستانێ دەنگێن پارتیەکێ زێدە بوونە، یێن ٢ پارتیان ژی کێم بوونە

کۆمپانیا لێکۆلین و راپرسیان “راوەست”ێ ل باکورێ کوردستانێ راپرسییەک دەربارێ گوھەرینا دەنگان بۆ ھلبژارتنان چێکر کو تێدا دەرکەتیە ھۆلێ، دەنگێن ئاکەپێ و ھەدەپێ ل گۆری ھلبژارتنێن بەرێ کێم بوونە ویێن جەهەپێ جارا ئەول زێدە بوونە.

راوەستێ، راپرسینا خوە ژ بۆ مەھا چلە ل باژێرێن دیاربەکر، مێردین، روحا و وانێ چێکریە کو ب ئاوایەکی رووبروو ل گەل ھەزار و 497 کەسان ھەڤدیتن ھاتنە کرن.

ژ بەشدارێن راپرسینێ هاتیە پرسین گەلۆ پرسگرێکا ھەری مەزنا ترکیێ چیە و مەیلا وەیا سیاسی چیە.

ل گۆر راپرسیا راوەستێ، ئاکەپە ژ سەدی 34.7% داکەتیە  28.5% و 6 پووان ژ دەست دانە، پارتیا دەمۆکراتیکا گەلان (ھەدەپێ) ژی ژ سەدی %52.4 داکەتیە %50.5 و 2 پووان کێم کریە.

ھەروھا جەهەپە کو د ھلبژارتنێن ھەرێمی دا ژ لایێ ھردرپێ ڤە پشتەڤانیا وێ ھاتبوو کرن، دەنگێن وێ ل باکورێ کوردستانێ زێدە بوونە و د 2018ێ دا کو رێژەیا دەنگێن وێ ژ سەدی 2.5 بوو، نھا گھیشتیە نێزیکی سێ قاتان و بوویە %7.4.

ل گۆری ئەنجامێن راپرسینێ پرسگرێکا ھەری بنگەھینا ترکیێ ئابۆرییە کو ژ ھەر سێ کەسان یەکی ئەو بەرسڤ دایە و رێژەیا کەسێن د چەند سالێن داوی دا رەوشا وان یا ئابۆری تێک چوویە ژی ژ سەدی 67 دەرکەتیە.

دیسا ل گۆری راپرسیا راوەستێ ئاکەپە ل باکورێ کوردستانێ ھێزا خوە وندا دکەت و ژ 100 کەسێن 2018ێ دەنگ داینە ئاکەپێ 25 کەس ژ وان ژ پارتیێ دوور کەتنە.

د راپرسیێ دا دەرکەتیە ھۆلێ کو دەنگێن پارتیا دەڤا یا عەلی باباجان ژ سەدی 5 و یێن پارتیا پێشەرۆژێ یا سەرۆکوەزیرێ بەرێ ئەحمەد داودئۆغلو ژی 3.1%یە.