نوونەرێ بەرێ یێ ئەمریکا ل رۆژئاڤایێ کوردستانێ ویلیام رۆبوک ئارمانجێن ئامەریکا ل سووریێ ئاشکەرا دکەت و رادگھینیت، ئەمریکا هیچ دەولەتەکا کوردی ل سووریێ ئاڤا ناکەت.
ویلیام رۆبوک کو د دەما بۆری دا نوونەرێ ئەمریکا ل باکورێ رۆژھلاتێ سووریێ، جیگرێ نوونەرێ تایبەتێ ئامەریکا بۆ سووریێ جیمس جیفری بوو و سەرپەرشتیا دانووستاندنێن د ناڤبەرا ئەنەکەسێ و پەیەنەکێ دکر، د ھەڤپەیڤینەکێ لگەل رۆژنامەیا “شەرق ئەل-ئەوسەت” چاپا لەندەنی دا راگھاند، “مە ب زەلالی گۆتیە ھێزێن سووریەیا دەمۆکراتیک (ھەسەدێ) کو ئەم پشتەڤانیا ئاڤاکرنا دەولەتەکا کوردی ل ڤێ ھەرێمێ ناکەین.”
ویلیام رۆبوک گۆت ژی: “رەوشا وێ ھەرێمێ ژ یا ھەرێما کوردستانێ جودایە. ھەڤپەیمانیا ناڤدەولەتی ھاتیە، ژ بۆ کو داعشێ تێک بشکێنیت. ھەسەدە ژی وێ یەکێ ب باشی دکەت. مە هاریکاری ژ بۆ سووریان و رێڤەبەریا خوەسەر پێشکێش کرن، داکو کارێ خوە ب ئاوایەکی باش بکەن. مە هاریکارییا لەشکری پێشکێشی ھەسەدێ کر، ژ بۆ رۆلا وێ ل دژی داعشێ بھێز ببیت، نە ژ بۆ کو باکورێ رۆژھلاتێ سووریێ کۆنترۆل بکەت.”
ئاشکەرا کر ژی: “شیرەتا مەیا ژ بۆ ھەسەدێ ھەر دەم ئەڤە بوو: د شەرێ ل دژی داعشێ دا پەیوەندیا وە ل گەل ئەمریکا و ھەڤپەیمانیێ بەردەوام دێ بیت، ل باکورێ رۆژھلاتێ سووریێ ئەولەھیەک هێتە پەیداکرن، ب کار و گۆتنێن وەک ئاڤاکرنا دەولەتێ یان ژی بکارئانینا ئایدۆلۆکییەکا دیار یان ژی ب سەمبۆلێن ئۆجالانی، ترکیێ تەحریک نەکەن.”
