پشتی 54 سالان دوو مالباتێن کورد ل ھەڤ ھاتن
ل باژارێ قامشلۆیێ رۆژئاڤایێ کوردستانێ دوو مالبات کو خوین د ناڤبەرا وان دا ھەبوو ل ھەڤ ھاتن و خویندارییا خوە ل پاش خوه ھشتن.
ل گۆر پێگه‌ها كوردستان 24ێ، پشتی 54 سالێن ئالۆزییا د ناڤبەرا مالباتێن حەجی رەشید و حەجی عەلی دا خوین ھات ژبیرکرن و دیسان سلاڤا براتیێ ل ھەڤ کرن.
ب ناڤبەینکارییا ئەنجوومەنا ریهسپیێن رێڤەبەرییا باکور و رۆژھلاتێ سووریێ و پارتییا دەمۆکراتا پێشڤەروو یا کوردی ل سووریێ و ب بەشدارییا ھەموو ئالیێن سیاسی و کەسایەتێن سەربخوە و ریهسپیێن دەڤەرێ، ئەڤ لھەڤھاتن پێک ھات.
مالباتا حەجی رەشید دا زانین کو وان ئەڤ لھەڤھاتن، بێ شەرت و مەرج قەبوول کرن و بەری ھەر کەسی خوین ژبیر کرن و قەرەبوو ژی نەخوەستن.
مژارا تۆلھلدانێ ل دەڤەرێ، چاندەکا کەڤن و دیرۆکی یە و بوویە سەدەما کۆچبەرییا گەلەک مالباتێن کو خوین د ناڤبەرا وان دا چێبوویە، ژ بەر ڤێ یەکێ کەسێن ناڤبەینکار دبێژن؛ ئەڤ لھەڤھاتن گاڤەکا بەر ب پاراستنا ژیانا ئاشتیانە و راکرنا ڤان عادەتێن کەڤنە، کو باندۆرا وان یا نه‌رینی ل سەر جڤاکی ھەیە.
ھەموو پێکھاتەیێن بەشدار، تەکەزی ل بەردەوامییا گاڤێن ب ڤی رەنگی کرن و دیار کرن کو پێویستی ب دەستپێشخەریێن وه‌ها ھەیە، نەمازە د رەوشا نھا یا سووریێ دا کو ب ده‌هان ھەزاران کەسان جانێ خوە ژ دەست دانە.
