سەرۆکێ ئه‌مه‌ریكایێ جۆ بایدن راگھاند، ژ بەر کو تەھران رێزێ ل بەندێن پەیمانا ئاتۆمی ناگریت، جەزایێن ل سەر ئیرانێ ناهێن راکرن.
کەنالا CBS دا ژ جۆ بایدن پرسی كانێ شیان ھەنە سزا ل سەر ئیرانێ رابن و تەھران جاره‌كا دی ڤه‌گه‌ریته سەر مێزا دانوستاندنان ژ بۆ بەردەوامکرنا لھەڤھاتنا سالا 2015ێ، جۆ بایدن د بەرسڤا خوە دا گۆت: «نه».
دەما کو ژ بایدن ھات پرسین کو دڤێت ئیران «پێتاندنا ئورانیومێ راوەستینیت» بایدن سەرێ خوە دھەژینیت ب واتەیا کو «ئەرێ دڤێت وه‌ھا بیت».
پشتی دانووستاندنێن درێژ و دژوار سالا 2015ێ ئه‌مه‌ریكا ل گەل ئیرانێ گه‌هشتبوو رێكکەفتنەکێ کو ئیران نه‌بیته خودان چەکێ ئه‌تۆمی. چین، رووسیا، ئالمانیا، فرانسا و بریتانیا رێکكەفتن ل گەل ئیرانێ ئیمزا کر.
سەرۆکێ بەرێ یێ ئه‌مه‌ریكایێ دۆنالد ترامپ سالا 2018ێ ئه‌مه‌ریكا ژ وێ پەیمانێ ڤەکشاند و ب خەراپترین لھەڤھاتن بناڤ کر.
سەرۆک بایدن، سۆزا ڤەگەرا پەیمانا ئه‌تۆمی دابوو ئەگەر کو ئیران ب تەمامی پێگریێ ب شەرت و مەرجێن پەیمانێ بكه‌ت، لێ رۆژا دوهـ رۆژا ئێكشه‌مبێ رێبەرێن ئیرانێ ب تایبەتی رێبەرێ ئۆلی ئایەتوللا عه‌لی خامەنەیی گۆت: «ئەگەر ئه‌و بخوازن ئیران پابەند بیت، دڤێت ئه‌مه‌ریكا ھەموو سزایێن ل سەر وێ نه‌هێلیت».
